Нурсултан Азыкбаев эмне үчүн Григорий Лепс менен ырдабай калганы маалымат жыйында белгилүү болот

Орусиянын Сочи шаарында 3-сентябрь күнү "Жаңы толкун" музыкалык сынагы башталган. Бүгүн, 9-сентябрда жыйынтыктоочу гала-концерт өтүп, жеңүүчүлөрдүн ысымдары расмий аталат. Кыргыз Республикасынын атынан катышкан Нурсултан Азыкбаев сынактын экинчи күнүндө, тагыраагы, 6-сентябрда мурун айтылгандай белгилүү ырчы Григорий Лепс менен эмес, анча белгилүү болбогон жаш ырчы кыз Ромади менен дуэт ырдаган эле. Кээ бири мындай өзгөрүү жөнүндө "Нурсултан көп упай албай калыш үчүн Лепс менен эмес, башка бирөө менен ырдатып коюшту" дешти. Бул тууралуу ырчынын менеджери Иззат Молтоев мындай деп билдирди:

"Жаңы толкун-2016" музыкалык сынагында Нурсултан 4-орунду алды деп ишеничтүү айта алабыз. 12 өлкөдөн келген 16 катышуучунун ичинен суурулуп чыгып, 4-орунду ээлөө жакшы жетишкендик деп ойлойбуз. Эртең Григорий Лепс менен ырдайм деп жатканда жаш ырчы Ромади менен ырдайсың деп коюшту. Ырды да туура эмес тандап берип коюшкан. Бул тууралуу Нурсултан сынактан келген соң 12-сентябрда маалымат жыйында кеңири маалымат беребиз. Учурда Нурсултандын маанайы эң сонун. Буюрса, эртең Бишкекке учуп келет".

Автор: Турсунай Алымкулова