Өспүрүм футболчуларыбыз Вьетнамга утулуп, Азия чемпиондугунун эшигин жабышты

Бүгүн, 22-сентябрда футбол боюнча өспүрүмдөр арасындагы Азия чемпиондугунун тайпалык баскычында 3-тур оюндары ойнолууда. Бүгүнкү күндөгү катталган жыйынтыктардын негизинде 4 тайпадан экиден команда мелдештин плей-офф баскычына чыкмакчы.

"В" тайпасында чечүүчү беттешин Вьетнамга каршы өткөргөн кыргыз футболчулары 3:1 эсебинде утулуп калышты. Мелдештин 6-мүнөтүндө иштиктүү чабуул Гүлжигит Алыкуловдун голу менен аяктап, курамабыз алдыга чыккан. Андан соң Эмир Шигайбаевдин катары менен кетирген 2 катасы чечүүчү болуп калды. Алгач атаандаш эсепти теңесе, кийинкисинде Эмир өз дарбазасына гол киргизүүгө мажбур болду. Жыйынтыгында 1-таймда 2:1 эсеби катталды. 2-таймда футболчуларыбыз алдыга умтулуп, бактысын каршылаштын дарбазасынан издеп жаткан маалда вьетнамдыктар каршы чабуул уюштурушту. Эки коргоочуга эки чабуулчу бет келип калган эпизоддо чабуулга атаандаштын 3-футболчусу кошулуп, топту алыскы бурчка узатты. 3:1 эсебинде Вьетнам жеңишке жетишип, карамагындагы 6 упай менен плей-офф баскычына жолдомо алды.

Ушуну менен курамабыз карамагындагы 3 упай менен тайпада 3-орунду ээлеп, мелдештин эшигин жапты.

Автор: Максат Кудайбердиев