7 дубан элди биримдикке чакырган “Бажарики” тасмасы жабык форматта көрсөтүлдү

Тасмадан кадр

Айкөл Аликжановага гүлдесте берилгенде

Режиссёр Амантур Ормуков өз сөзүн сүйлөп жаткан кези

Продюсер Нурлан Жаныбеков

Бүгүн, 19-октябрда "Манас" кинотеатрында “Бажарики” кинотасмасы жабык форматта көрсөтүлдү. Ага актёр, актрисалар, маданият өкүлдөрү, тасмага катышкандардын жакындары келишти. Тасма саат 18:00дө башталары жазылганы менен, 2,5 саат кечигип, саат 20:28де башталды. Бул жагдайды тасма жаратуучулары техникалык жактан маселелер болгону менен түшүндүрүштү.

Тасмага Жоробек Аралбаев, Улан Жумабаев, Улан Барпиев, Максат Усенов, Атай Өмүрбеков, Шумкар Бейшеналиев, Радик Эшимов, Нуриза Бектурова, Айкөл Аликжанова жана башкалар тартылышкан. Фильмдин режиссёру жана сценарийдин автору - Амантур Ормуков. Ал эми тасманын продюсерлеринин бири Нурлан Жаныбеков төмөнкүлөргө токтолду: "Тасманы тартуу иштери 2 айга созулду. Аны жаратуудагы башкы максатыбыз - 7 дубан элибизди биримдикке чакыруу. Жанры комедия болгону менен, олуттуу маселелерди чагылдырганга аракет кылдык".

Актриса, модель Айкөл Аликжанова бул тасма ал тартылган эң акыркы тасма экенин айтып, себебин хиджаб кийип, дин жолуна түшкөндүгү менен түшүндүрдү. Кечеде актриса сахнада сөз сүйлөп жатканда болочоктогу жолдошу роза гүлдөрүнөн жасалган көлөмдүү гүлдесте белек кылды.

Тасманын башкы каарманы Дамирдин 6 кызы бар. Үйлөнгөндөн бери эле уулдуу болууну самап келет, бирок тилеги аткарылбай калган. Кыздарынын бешөө 5 дубандын жигиттерине турмушка чыккан. Башка облустардын тургундарын анча жактырбаган Дамир 6-кызынын бишкектик жигитке турмушка чыгуусун пландап жүрөт. Атасынын туулган күнүн өткөрөбүз деген кыздары, күйөө балдары анын үйүнө чогулушат. Башкы каармандын жашоосун өзгөртө турган окуялар мына ошол жерден башталат...