Кыргыз кызы Санкт-Петербургда өзү жасаган айкелдерин көргөзмөгө даярдап жатат

Чет өлкөдө окуп билим алган кыргыз жаштары көп. Алардын баары болбосо да, көпчүлүгү өз өнөрлөрү менен ийгиликтерди жаратышууда. Мындай студенттердин катарын мекендешибиз Тамила Маматова толуктайт. Ал учурда Санкт-Петербургдагы И.Е.Репин атындагы Мамлекеттик көркөм өнөр, айкел жана архитектура академиялык институтунун 5-курсунда окуйт. Тамила Маматова SUPER.KG порталына 25-ноябрдан 9-декабрга чейин "Өмүр сызыгы" аталышындагы өзүнүн көргөзмөсүн өткөрөрүн кабарлады.

"Көргөзмөнүн максаты - кыргыздын улуттук маданиятын орус жергесинде көрсөтүү. Ошондой эле көргөзмө өлкөбүздөгү Маданият жана тарых жылына карата, улуу жазуучу Чыңгыз Айтматовдун туулган күнүнүн урматына өтөт", - дейт өзүнүн көргөзмөсү тууралуу Маматова.

"Айкел жасоого бала чагымдан кызыкчумун. Кичинекей кезимден сүрөт тартып, пластилин менен көп ойночумун. Кесибимди тандаган соң чыгармачылыкка кириштим. Жалпысынан 10 жылдан бери айкел жасоо менен алектенем", - деди өзү тууралуу.

Тамила Маматова ушул жылы өткөн “Ысык-Көлдүн сыйкырдуу кумдары” аталышындагы кумдан жасалган скульптуралардын фестивалына да катышкан.

"Ал симпозиумга катышып, Манас баатырдын скульптурасын жасагам. Албетте, сүрөттөгү эмгектердин баары меники", - деди айкелчи.

Аталган көргөзмө Санкт-Петербург шаарынан кийин Москвада өтөрү маалым болду.

Автор: Үмүт Абдраимова
Фото: Тамила Маматова