Айпери Кубик кызы 2 килограммдай болуп төрөлсө, Кенже Дүйшеева 9 айында баскан

Бүгүн, 17-ноябрь - Ара төрөлгөн балдардын бүткүл дүйнөлүк күнү. Бул күн Кыргыз жергесинде быйыл 2-жолу гана белгиленип жатат. Кыргыз жергесинде бир жылда 8 миңдей бала ара төрөлөт. Ар бир наристе төрөлгөн соң бардык тирүү жандардай жашоо үчүн күрөшөт, бирок ара төрөлгөн балдардын аракети күчтүүрөөк болот. Мындан улам алар өзгөчө тың, жашоого жөндөмдүү болушат деп айтылып келет. Буга мисал катары Марк Твен, Альберт Эйнштейн, Дмитрий Менделеев, Антонио Вивальди, Наполеон Бонапарт, Александр Пушкин сыяктуу чыгаан адамдарды айтсак болот. Ал эми орусиялык жылдыздар арасында Жанна Фриске жана Иван Ургант ара төрөлгөндөрдүн катарын толукташса, кыргыз жылдыздарынан Кенже Дүйшеева жана Айпери Кубик кызы маалынан эрте төрөлгөн.

Айпери Кубик кызына байланышканыбызда ал бүгүнкү күн тууралуу бизден укканын, өзүнүн бул дүйнөгө эрте келгендигинин себеби апасынын ошол кездеги түйшүгүнөн улам болгонун айтат.

"1991-жылы апам 19 жашта болуп, окуп да, иштеп да жүрүптүр. Андан сырткары ал жылдары кыйынчылыктар болуп жатпады беле... Бир күнү жумушуна текшерүү келгенде апам катуу сарсанаа болуптур, анан ошол күнү мени төрөп койгон экен. Мен 7 айлык болуп, 2 килограмм 100 грамм салмакта төрөлүптүрмүн. Доктурлар жашап кетериме көзү жетпей, бир айдай вакуумга жаткырышыптыр", - дейт ырчы.

Ырчы "эгер өз убагында, тагыраагы, 9 айлык болуп төрөлсөм, арык болбойт элем" деп ойлойт. Мисал катары инисин, сиңдисин айтып өттү.

"Көбүнөн өз убагынан эрте төрөлгөндөр тырышчаак, чыйрак, күйүмдүү болушат деп угам. Менин да өжөрлүгүмдү ушуга байланыштырышат", - дейт Айпери Кубик кызы.

Ал эми ырчы Кенже Дүйшееваны бизге чейин улуу агасы телефон чалып тамашалап куттуктаптыр. Ал 11 бир туугандын 8-си. Ырчы төрөлгөндө канча салмакта болгонун билбегенин, апасы аны үйдөн эле төрөгөнүн, атасы киндигин кескен соң гана төрөт үйүнө барганын айтты.

"Ал кезде үйдүн түйшүгү көп, 7 баланы багып, оокаттан кыйналгандан улам мени төрөп койгон окшойт. Мени "куурчактай болгонуңдан бирөөгө көргөзгөндөн уялчумун" деп айтып калат апам. Кыргыз элинин ырымдарына ылайык, мени тумакка салып уктатып, ата-энемдин кийимине ороп торолтушуптур. Эрте төрөлсөм да, эрте торолуп, туугандарымдын арасынан баарынан эрте басып, эрте сүйлөгөн мен болуптурмун", - деп күлдү Дүйшеева.

Кенже Дүйшеева да ара төрөлгөндөр тың болушарына ишенет жана бири-бири менен бат тил табышат деп эсептейт. Себеби, ырчынын айтымында, аны менен жакшы мамиле түзүп кеткендердин көбү 7 айлык болуп төрөлгөндөр. Ал эми Дүйшееванын эрте басып кеткенин апасы минтип айтып берген: "9 айлык кезиңде малды айдайын деп, жерге отургузуп баратсам, аркамдан чыбык көтөрүп алып там-туң басып келе жатыптырсың. Көрөр замат "Качан жыгылат?.." деп чочуп, чуркап барып көтөрө калдым. Эл көрбөсүн, көрсө көз тиет деп эки жагымды карайм, эч ким жок. Кайра жерге койсом, кайра басып кеттиң. Атаң келгенде ага көрсөтсөм, ал дагы чочуп, жыгылат деп коркуп көтөрө калган".

"9 айлык болгонумда кандай болмок экенимди билбейм. Балким, боюм узунураак болмок, себеби туугандарымдан боюм кыска, бирок акыл жагынан алдыдамын. Туугандарым "7 айлык кылып эле төрөш керек экен" деп тамашалап калышат. Ата-энеме ушул дүйнөгө алып келип, татыктуу тарбия бергендерине ыраазымын", - дейт ырчы.