ЖЫЛНААМА, 2-ДЕКАБРЬ: Америкалык ырчы Бритни Спирс 35 жашка толду

Ырчы уулдары менен

Америкалык ырчы, "Грэмми" сыйлыгынын ээси, бийчи жана актриса Бритни Спирс 35 жашка толду. Ал 1981-жылы 2-декабрда АКШнын Луизиана штатындагы Кентвуд шаарында төрөлгөн. Бала чагында көркөм гимнастикага кызыгып, чиркөө хорунда ырдаган. Нью-Йорктогу актёрдук мектепте 3 жыл билим алган.

12 жашында "Дисней" телеканалында "Микки Маустун жаңы клубу" телекөрсөтүүсүндө иштеген. Андан соң Луизиана шаарына көчүп барып, "Innosense" тобуна вокалист болуп кирген. Ошондой эле "Backstreet Boys", "N Sync" топторунун концерттеринде ырдаган.

Анын алгачкы "Baby One More Time" аттуу ыры 1998-жылы чыгып, ырчыны жылдызга айланткан жана анын 9 миллиондон ашуун көчүрмөсү сатылган. Бир жылдан соң ушундай эле аталыштагы ыр жыйнагы чыккан. Ырчынын "Oops!… I Did It Again" аттуу экинчи ыр жыйнагы 2000-жылы чыгып, ийгилик алып келген. Мындан тышкары "Britney", "In The Zone", "Blackout", "Circus", "Femme Fatale", "Britney Jean" жыйнактары жарык көргөн. Бритни Спирс ырчылыктан тышкары актрисалык кесипти аркалап, "Кесилиштер", "Britney: For The Record" аттуу тасмаларда башкы ролду аткарган. 2006-жылы "Уилл жана Грейс" сериалында роль жараткан. Ал эми 2009-жылы ырчынын жашоосун чагылдырган "Бритни Спирс. Айнек артындагы жашоо" деген аталыштагы даректүү фильм жарык көргөн. 2013-жылы ырчы "Ooh La La" жана "Scream & Shout" деген ырларын, 2015-жылы австралиялык ырчы Игги Азалия менен бирге "Pretty Girls" аттуу композицияны жаздырган. "Slumber Party", "Glory", "Do You Wanna Come Over?", "Clumsy" жана башкалар Бритни Спирстин акыркы ырларына кирет. Ушул күнгө чейин ырчынын 4 китеби жарык көргөн.

"Forbes" журналы Бритни Спирсти шоу-бизнестеги эң бай аялдардын ичинен 12-орунга койгон. Себеби ал 2008-жылдан 2009-жылга чейин 35 миллион доллар киреше тапкан. 2011-жылы Б.Спирс ырчы Леди Гаганын колунан "MTV Video Music Awards" сыйлыгын алган.

2-декабрга карата жылнаама.

Автор: Саадат Токтоболот кызы