ЖЫЛНААМА, 6-ДЕКАБРЬ: Айтылуу "Ласковый май" тобунун түзүлгөндүгүнө 30 жыл болду

"Ласковый май" тобу

Юрий Шатунов 1989-жылы "Ласковый май" тобунун концертинде

Күйөрмандар концерт учурунда

Айтылуу "Ласковый май" тобунун түзүлгөндүгүнө 30 жыл болду. 1986-жылы 6-декабрда Оренбург шаарындагы балдар үйүндө чоңойгон эркек балдардан турган "Ласковый май" тобу түзүлгөн. Бул топ өзүнүн мүчөлөрүн ата мекендик шоу-бизнестин жылдыздарына айланткан.

"Ласковый май" - 80-жылдардын аягынан баштап 90-жылдардын аягына чейинки мезгилде атактуулукка жетишкен евродиско стилиндеги, СССРдеги өспүрүмдөргө багытталган алгачкы топ. Бул топ өспүрүмдөрдүн гана эмес, бардык курактагы адамдардын арасында популярдуулукка жеткен. Анын визиттик карточкасы "Белые розы" ыры болгон.

"Ласковый май" чыгармачылык жолун №2-мектеп-интернатынын сахнасында баштаган. Жергиликтүү музыка ийриминин жетекчиси Сергей Кузнецов жаңы жылдык концертке карата 3 баладан турган топ түзүп, аны "Ласковый май" деп атаган. 1987-жылы 18-февралда Сергей Кузнецов жана топтун ырчысы Юрий Шатунов бардык ырларын жаздырышып, бекеттеги үн жаздыруу күркөсүнө беришкен. 2 айдан соң Сергей Кузнецовго ар кайсы шаардан чалышып, концерттерде ырдоого чакырышкан. Ошондой эле музыкалык пррдюсер Андрей Разин топтун ырларын уккан соң аларды Москвага чакырып, продюсерине айланган.

Топ атактуулуктун туу чокусуна жеткенде, 1989-жылы бир күндө 4-5 концерт берип, бир жылда алардын саны 2500гө жеткен. Сергей Кузнецов 1989-жылы топту таштап кеткен. Ал эми 1992-жылы Юрий Шатунов топтон кеткенден кийин "Ласковый май" тарап кеткен.

6-декабрга карата жылнаама.

Автор: Саадат Токтоболот кызы