ЖЫЛНААМА, 26-ДЕКАБРЬ: 14 жыл мурун Кыргыз Республикасынын Эл артисти, режиссёр Искендер Рыскулов көз жумган

Мындан 14 жыл мурун, 2002-жылы 26-декабрда Кыргыз Республикасынын Эл артисти, режиссёр Искендер Рыскулов 62 жаш курагында көз жумган.

Режиссёр 1941-жылы 30-июнда Фрунзе шаарында кыргыз киносу менен театрынын залкар артисти Муратбек Рыскуловдун үй-бүлөсүндө туулган. Орто мектепти аяктаган соң Советтик Армиянын катарында кызмат өтөп келип, 1962-жылы Ташкенттеги Александр Островский атындагы Театр жана сүрөт өнөрү институтунун драмалык жана киноактёрлук факультетине тапшырып, кыргыз студиясында окуган. И.Рыскуловдун курсташтарынын арасында атактуу Соң-Көл чүрөгү Таттыбүбү Турсунбаева дагы болгон.

1966-жылы институтту аяктап келгенден кийин бир жылдай Кыргыз мамлекеттик драма театрында артист болуп эмгектенген. 1967-жылы И.Рыскулов кайрадан окуусун улантат. Бул ирет Москва шаарындагы Анатолий Луначарский атындагы окуу жайдын режиссёрдук факультетине өткөн.

Окуусун 1972-жылы аяктап, жаңыдан ачылган Оштогу Кыргыз драма театрына режиссёр-коюучу болуп кызматка кирген. 1976-жылдан тартып ушул эле театрдын башкы режиссёрлугунун кызматын аткарат. Ош кыргыз драма театрында 12 жыл эмгектенген соң, 1984-жылы Кыргыз мамлекеттик академиялык драма театрына башкы режиссёр болуп дайындалат. 1989-жылы башкы режиссёрлуктан түшүрүлүп, өмүрүнүн акырына чейин аталган театрда режиссёр-коюучу болуп кызмат өтөгөн.

Режиссёр сахналаштырган драматург Токтоболот Абдумомуновдун "Эч кимге айтпа", Бексултан Жакиевдин "Күттүргөн жаз да келер", "Саадак какты", "Атанын тагдыры", Бакы Өмүралиевдин "Жаңырык", Александр Грибоедовдун "Акылдан азап", Уильям Шекспирдин "Гамлет", "Он экинчи түн", "Ричард III", "Король Лир", "Ромео менен Жульетта", Максим Горькийдин "Түпкүрдө", Мырза Гапаровдун "Күнөстүү арал", Чыңгыз Айтматовдун "Ак кеме", "Деңиз бойлой жорткон ала дөбөт" жана башка 60тан ашык спектаклдери кыргыздын улуттук сахна өнөрүндөгү өзгөчө көркөм окуяга айланган чыгармалар болгон.

26-декабрга карата жылнаама.

Автор: Саадат Токтоболот кызы