Быйыл Ысык-Көлдүн атынан футбол боюнча өлкө чемпиондугуна 1 команда катышат

Футбол боюнча өлкө чемпиондугу - ТОП-Лигада командалардын санын арттыруу аракеттери кызуу жүрүп жатат. Акыркы сезондо мелдешке 7 команда катышып, Оштун "Алай" командасы чемпион болду.

Футбол федерациясынын президенти Семетей Султанов Ысык-Көл облусунун башчысы Аскат Акибаев менен жолугуп, футбол жаатында баарлашуу орун алды. Жыйынтыгында облус башчы быйылкы сезондо өлкө биринчилигине облус атынан 1 команда даярдап берүүнү убада кылды.

Футбол Лигасынан кабарлашкандай, эгерде облус башчы сөзүнө турса, Ысык-Көлдө стадион жана мейманкана курулат.

Акыркы сезондо ТОП-Лигада оюн көрсөткөн 7 команданын экөө: "Дордой", "Алга" Бишкектин атынан чыгышат. Ал эми "Ала-Тоо" командасы кагаз жүзүндө Нарындын командасы катары катталганы менен, оюндарды Бишкекте өткөрөт. "Алай" менен "Алдиер" клубдары Оштун атынан чыкса, Чүй облусунан канттык "Абдыш-Ата" менен кара-балталык "Кара-Балта" клубу мелдеште күч сынады.

Автор: Максат Кудайбердиев
Фото: Ксения Толканева