Дүйнө жүзүнө белгилүү италиялык ырчы, актёр жана алып баруучу Адриано Челентано 79 жашка толду.
Ал 1938-жылы 6-январда Италиянын Милан шаарында жарык дүйнөгө келген. 12 жашында мектепти таштап, үй-бүлөсүнө жардам берүү үчүн саат оңдоочу болуп ишке орношот. Ошол мезгилде музыкага болгон сүйүүсү, кызыгуусу башталат. Бир жолу спектаклдердин биринде ал ырчы Луи Примге пародия жасап, көпчүлүктүн көзүнө илинип, бир нече сынактарга чакыруу алган. Рок-н-роллго кызыгып, Элвис Пресли жана Жерри Ли Льюистин чыгармачылыгынан таасир алат.
Адриано Челентано 1954-жылдан баштап өзүнүн чыгармаларын жарата баштайт. Ал 1957-жылы "Rock Boys" тобу менен алгачкы жолу чоң сахнага чыккан. Анда ал "Мен сага "чао" дейм" ("Chao ti diro") аттуу өзү жазган ырын аткарган. 1958-жылы Анкона шаарында өткөн музыка фестивалында жеңишке жетишет. Бир жылдан соң "Козголоңчу" ырын жаздырып, немистердин үн жаздыруучу компаниясы менен келишим түзүп, миллиондон ашуун нуска менен алгачкы ыр жыйнагы жарыкка чыккан. Ушул учурдан тарта рок-н-роллчу А.Челентано жылдызга айланган. Күйөрмандары анын коңур үнүн эле эмес, сахнадагы динамикалуу кыймылдарын жактырышкан. Мындан улам аны серпилгиге (пружина) салыштырышкан.
1966-жылды ырчынын чыгармачылыгындагы бурулуш деп аташат, себеби фестивалдардын биринде ал автобиографиялык "Глюк көчөсүндөгү бала" ырын аткарып, бул ыры миллиондогон адамдардын жүрөктөрүн багынткан. Дүйнөнүн 22 тилине которулуп, жарым жыл бою италиялык хит-параддардан биринчи орундан түшкөн эмес. Ырчынын жалпысынан блюз, итало-диско, электрондук музыка, рэп, баллада, романтикалык рок багыттарындагы ырларды камтыган 40 ыр жыйнагы чыккан.
А.Челентано кинодогу алгачкы ролун 1959-жылы "Балдар жана музыкалык автомат" тасмасында аткарган. Андан кийин 1960-жылы "Таттуу жашоо" тасмасына тартылган. Режиссёр Пьетро Жерминин "Серафино" тасмасындагы ролунан соң А.Челентано дүйнөлүк атак-даңкка жеткен. Жалпысынан актёр 40 тасмага тартылган: "Блеф" (1976), "Кежирди жоошутуу" (1980), "Акылдан азып сүйгөн адам" (1981), "Бинго-Бонго" (1982), "Гранд-Отель", "Эксцельсиор" (1982), "Жоанн Луй" (1985), "Жекпот" (1992) жана башкалар.
А.Челентано жубайы, актриса Клаудия Мори менен "Кызыктай бир адам" тасмасын тартуу учурунда таанышып, 1964-жылы үйлөнүшкөн. Экөөнүн ортосунда 2 кыз жана 1 уулу бар. Экөө жаш кезинде "Биз дүйнөдөгү эң сулуу түгөйлөрдөнбүз" аттуу ыр жаздырышкан. Адриано Челентано үйлөнгөндөн кийин италиялык актриса Орнелло Мути менен сүйүү мамилесин куруп, актриса аны менен бирге болуу үчүн күйөөсү менен ажырашкан. Бирок көп өтпөй А.Челентано өзүнүн үй-бүлөсүнө кайтып келип, аялынан жана балдарынан эл алдына чыгып кечирим сураган.
Актёр өзүнүн харизмасы менен дүйнө жүзүндөгү миллиондогон айымдардын жүрөктөрүн багынткан. Анын үнү, кыймылдары күйөрмандарын суктандырып, кинодогу ролдорунда айткан сөздөрү ушул убакка чейин жалпы көрүүчүлөрдүн эсинде. Анын тасмалардагы айымдар менен болгон кээ бир күлкүлүү диалогдорун жана өзү айткан сөздөрүн сунуштайбыз.
- - Сен мени кайсы бир убакта жоготуудан корктуң беле?
- Ооба, бир жолу экөөбүз автобуска чогуу түшүп, бирок жол кирени төлөөр маалда мен сенден артта калып калгам. Анда акча сенде эле.
- Мен ал жанымда жок болгону үчүн дем ала албай жатам деп ойлогом. Көрсө, сасык тумоолоп калыптырмын.
- - Дүйшөмбү күнү саат 5:00дө бошсуңбу?
- Ооба!
- А мен бош эмесмин.
- Идеалдуу адамды издебегиле, бүгүн мен үйдөмүн.
- - Билесиңби, адамды кантип интрига кылыш керек?
- Кантип?
- Эртең айтам.
- - Бүгүн мен Валентинонун костюмун кийип жүрөм.
- Валентинoнунбу? Мен өзүңдүн кийимиң экен деп ойлогом.
6-январга карата жылнаама.
