ЖЫЛНААМА, 11-ЯНВАРЬ: "Түнкү күзөт", "Кыйраткыч күч" тасмаларынын жылдызы, орусиялык актёр Константин Хабенский 45 жашка толду

Экинчи жубайы Ольга Литвинова менен

Уулу Иван менен

Биринчи жубайы Анастасия Хабенская менен

"Түнкү күзөт", "Кыйраткыч күч" тасмаларынын жылдызы, орусиялык актёр Константин Хабенский 45 жашка толду.

Ал 1972-жылы 11-январда Орусиянын Ленинград шаарында жарык дүйнөгө келген. 1990-жылы Ленинграддагы Театр, музыка жана кинематография институтуна тапшырган. Окууну аяктаган соң "Перекрёсток" эксперименталдык театрында, андан соң Москва, Петербургдагы театрларда иштеп, "Трехгрошовая опера", "Сирано де Бержерак", "Войцек", "В ожидании Годо", "Король, дама, валет", "Калигула", "Утиная охота" спектаклдеринде ойногон.

1994-жылдан баштап актёр телекөрсөтүүлөрдө алып баруучу болуп эфирге чыгып, фильмдердин эпизоддоруна тартыла баштаган. "Байлар үчүн үй" тасмасында ал башкы ролдордун бирин жаратып, бул ролу үчүн "Адабият жана кино" фестивалында "Эң мыкты эркектин ролу" наамын алган. Аны 2000-жылы чыккан "Кыйраткыч күч" сериалы атактуулукка жеткирген.

2004-жылы экрандарда К.Хабенский башкы ролдо ойногон биринчи орусиялык блокбастер - "Түнкү күзөт" тасмасы пайда болот. Мындан тышкары актёр белгилүү "Адмирал", америкалык "Өзгөчө кооптуу", "Ак гвардия", "Географ глобусту ичкиликке сарптады" жана башка бир катар тасмаларда роль аткарган. К.Хабенский жалпысынан кинодо 40тан ашык, Петербургдагы жана Москвадагы театрларда коюлган спектаклдерде 30дай роль жараткан.

2000-жылы 12-январда актёр журналист Анастасия Хабенская менен баш кошкон. 7 жылдан соң Иван аттуу уулдуу болушуп, 2008-жылы Анастасия мээсиндеги шишиктен улам көз жумган. 2013-жылы актриса Ольга Литвиновага үйлөнгөн.

К.Хабенский рак илдетине чалдыккан балдарга жардам көрсөтүүчү кайрымдуулук фондун негиздеген. 2015-жылы актёрдун катышуусундагы "Ыкма" деген аталыштагы тасманын бет ачары болуп өткөн.

11-январга карата жылнаама.

Автор: Саадат Токтоболот кызы