ЖЫЛНААМА, 17-ЯНВАРЬ: Атактуу актёр, комедия жылдызы Жим Керри 55 жашка толду

"Кудурети күч Брюс" тасмасынан кадр

Атактуу канадалык жана америкалык актёр, комедия жылдызы Жим Керри 55 жашка толду. Ал 1962-жылы 17-январда Канаданын Онтарио провинциясындагы Ньюмаркет деген жерде туулган. АКШдагы эң көп гонорар төлөнгөн комиктердин сап башында турат.

Актёр өзүнүн эмгек жолунда эки ирет "Алтын глобус" сыйлыгына ээ болсо, алты жолу ал сыйлыкка көрсөтүлгөн. Бирок "Бет кап", "Алдамчы", "Кудурети күч Брюс" сыяктуу бир топ тасмалардын көркүн ачкан актёр, комедиялуу кинолордун "атасы" Жим Керри бир да жолу "Оскарга" талапкер болгон эмес.

Ал: "Прожектордун жарыгына көзүмдү уялтып, сыймыктануу, толкундануу менен сахнада тургум келет. Албетте, мындай жагымдуу учурга "Оскарды" алганда гана туш болсом керек. Бул эң башкы максатым", - деп айткан. Ал эми актёрдун күйөрмандары: "Керринин талантынын алдында "Оскар" эч нерсеге татыбайт. Анын атагы бул сыйлыктан көз каранды эмес", - деп билдиришкен. Актёр "Эйс Вентура" (1993), "Трумандын шоусу" (1998), "Айдагы киши" (1999), "Дайыма "ооба" де" (2008), "Мистер Поппердин пингвиндери" (2011) жана башка бир катар тасмаларда унутулгус ролдорду жараткан. 1997-жылы Ж.Керри "People" журналынын версиясы боюнча дүйнөдөгү эң сулуу адамдардын катарына кирген.

Жеке жашоосу

1987-жылы 8-мартта актёр Мелисса Уомер аттуу актрисага үйлөнүп, ошол жылдын 6-сентябрында Жейн аттуу кыздуу болгон. 1991-жылы ноябрда Жим апасынан, 1994-жылы атасынан айрылып, үй-бүлөдө уруш-талаштар көп боло баштаган. Атасынын өлүмүнөн бир жыл өткөн соң ал Мелисса менен ажырашкан. Актрисага 7 миллион доллар төлөп берип, депрессияга кабылган. Мындай абалдан чыгуу үчүн Ж.Керри антидепрессанттарды колдонуп, ал жыйынтык бербегендиктен, витамин ичип, спорт менен машыга баштаган. 1995-жылы актриса Лорен Холли менен баш кошуп, 10 айдан кийин ажырашып кеткен. Мындан тышкары актёр Рене Зеллвегер, өзүнүн дарыгери Тиффани Сильвер жана моделдер Женни Маккарти, Анин Бинг, Катриона Уайт менен сүйүү мамилелерин курган. Ж.Керринин кызы Жейн рок тобунда ырдап жүрүп, 2009-жылы кесиптешине турмушка чыгып, уулдуу болгон.

17-январга карата жылнаама.

Автор: Саадат Токтоболот кызы