МЕДИА-ПОРТАЛ: Эксклюзив! "Бийкеч" клибине тартылуу үчүн Добр менен Руслан Абылов атайын бий үйрөнүшкөн

Бүгүн, 7-февралда "Медиа-портал" бөлүмү ырчылар Добр менен Руслан Абылов аткарган "Бийкеч" ырынын клиби менен толукталды. Руслан Абылов клип үчүн Добр экөө атайын бий үйрөнүшкөнүн айтат.

"Клипте экөөбүз окшош бийлейли деген элек. Анан атайын бийди үйрөнүүгө туура келди. "Жугуштуу" заманбап бийлер болот эмеспи, алсак, түштүк кореялык PSY`дын "Гангнам стайл" ырындагы бий сыяктуу. Биз да ошондой бийлердин түрүн карап чыгып, "Береке" бий тобундагы Айнура аттуу кыздын көрсөтмөсү менен даярдандык.

Добр экөөбүздүн бийлегенибиз окшошпой жатты, мен бийлегенде ал тартылбай калат же кыймыл-аракеттерибиз бирдей болбой калат. Анан да бийчилер суукта жука кийимчен сыртта тартылган учурда аябай үшүп калышкан. Кудайга шүгүр, эч ким оорубай, баарын жакшы бүтүрүп алдык", - дейт ырчы.

Клип Бишкекте жалпысынан бир айда тартылып бүткөнүн, аны тартууга миң доллардай акча кеткенин ырчы кошумчалады. Ошондой эле клипке Добрдун келинчеги Жибек да тартылган.

Добр менен Руслан Абыловдун "Бийкеч" ырынын клибин бул жерден көрүңүз.

Автор: Турсунай Алымкулова