Британиялык ырчы Адель "Hello" ыры менен "Грэмми" сыйлыктарына ээ болду

Адель

Ченс Рэпер

Бейонсе

Британиялык ырчы Адель "Hello" ыры менен "Жылдын ыры" номинациясында "Грэмми" сыйлыгына ээ болду. Бул тууралуу америкалык басылмалар жазып чыгышты.

"Грэмми" сыйлыгын тапшыруу аземи Калифорния штатындагы Лос-Анжелесте 12-февралда өткөн.

Адель менен биргеликте бул категорияда Бейонсе (Formation), Жастин Бибер (Love Yourself), Майк Познер (I Took a Pill in Ibiza) жана Lukas Graham тобу (7 Years) ат салышкан.

Ошондой эле Аделдин "25" аттуу альбому "Жылдын мыкты альбому" жана "Мыкты поп-альбом" номинацияларын утуп кеткен. "Hello" ыры "Жылдын мыкты жазмасы" номинациясында да алдынкы орунду алган. Мындан тышкары, ушул эле ыры менен ал "Мыкты жеке поп-аткаруучу" категориясында жеңишке жетише алган.

Америкалык хип-хоп-артист Chance the Rapper (Ченс Рэпер) "Грэмми" сыйлыгын "Мыкты жаңы аткаруучу" катары жеңди. Канадалык хип-хоп-аткаруучу Дрейк "Грэмми" сыйлыгына "Мыкты рэп-ыр" номинациясында ээ болду. Бейонсенин "Lemonade" альбому "Урбан стилиндеги мыкты альбом" деп аталган. Сыйлык алар алдында кош бойлуу Бейонсе 2 ырды аткарган.

"Мыкты музыкалык тасма" категориясында "The Beatles: Жумасына 8 күн" документалдуу тасмасы жеңген. Ал эми Жон Уильямстын "Жылдыз жоокерлери: Күчтүн ойгонушу" тасмасына жазган саундтреги "Мыкты саундтрек" деп табылган. Жастин Тимберлейктин "Тролли" мультфильминде ырдалган "Can't Stop the Feeling!" ыры "ТВ жана медиага жазылган мыкты ыр" номинациясында сыйлыкка ээ болгон.