“Моника Беллуччи" командасы беш жылдан кийин алгачкы жолу жеке концертин өткөрдү

"Тамашоу" долбоорунан чыккан “Моника Беллуччи" командасы беш жылдан кийин алгачкы жолу жеке концертин өткөрдү. Концерттин жүрүшүндө "тамашоучу" жигиттер көрүүчүлөргө жаңы тамашаларды тартуулашты.

“Биз бүгүн 5 жылдан кийин чогулуп күйөрмандарыбызга кайрадан концерт уюштуруп жатабыз. Бул жолу жаңы тамашаларды даярдап келдик. Анткени эл эски тамашаларга күлбөйт. Элди өзүбүзгө тартуунун жолун издедик. Бүгүнкү концертти кайрымдуулук үчүн уюштурганбыз. Кыргыз элинин арасында ден соолугунун мүмкүнчүлүгү чектелген бир адам бар экен. Анын ден соолугу үчүн кам көрүүдөбүз. Концерттен түшкөн каражатты ошол адамдын дарылануусуна которобуз”, - деп билдирди команданын мүчөсү Жеңиш Майрамбек уулу.

Концерттик программанын жүрүшүндө "тамашоучулар" Нурлан Мотуевди тамашага салган эпизоддорду аткарышты. Мындан сырткары Көчмөндөр оюндарындагы испан аты менен кыргыз атынын ат майданында көргөзгөн оюндарынан сахналык көрүнүш көрсөтүлдү.

Концертке эстрада ырчысы Анжелика Бекболиева, Гүлнур Сатылганова, "тамашоучу" Азамат Исмаилов, Санжар Мыкыев катышты.

Программанын жүрүшүндө Гүлнур Сатылганова "Керемет дүйнө", "Сахна" аттуу чыгармаларын аткарып берди. Ошондой эле "Моника Беллуччи"'командасынын сахнадагы орду бийик экендигин айтып, аларга ийгилик каалады.

“Биз бүгүн концерттен эң мыкты тамашаларды көрдүк. Анткени бул командадагы оюнчуларды жакшы тааныйм. Аябай таланттуу балдар. Келинчегим экөөбүз күлкүгө сугарылып, жакшы эс алдык”, - деп билдирди "тамашоучу" Азамат Исмаилов.

Концерттин жүрүшүндө сахнадан "Жигиттер", "Ак-Өргө сити", "No name" командаларынын капитандарын да көрүп жаттык. Концерттик программанын өзгөчөлүгү, көрүүчүлөрдүн конок катары чакырылган "Тамашоу" командаларынын өкүлдөрүнө суроо берип, жооп алып жаткандыгында болду.