ЖЫЛНААМА, 16-ФЕВРАЛЬ: 9 жыл мурун Орусиянын Эл артисти, белгилүү актёр Борис Хмельницкий дүйнө салган

Мындан 9 жыл мурун, 2008-жылы 16-февралда советтик жана орусиялык актёр, композитор, Орус Федерациясынын Эл артисти Борис Хмельницкий Москвада рак оорусунан каза болгон. Актёр 1940-жылы 27-июнда Приморье крайындагы Уссурийск шаарында төрөлгөн. Кекечтигинен улам театралдык окуу жайга тапшыруудан баш тартып, музыкалык мектепке кирген. Кийинчирээк Москва шаарындагы театралдык училищеге кабыл алынып, аны 1966-жылы аяктаган.

1964-1982-жылдары Москва драмалык жана комедиялык театрында актёр катары иштеп, кекечтигинен арылган. Таганка театрындагы "Добрый человек из Сезуана" постановкасына тартылгандан кийин Борис Хмельницкий уламышка айланган. Аны театрда боорукерлиги жана кайрымдуулугу үчүн Бэмби деп аташкан.

Ал Робин Гуддун ролун аткаргандан кийин бүткүл Советтер Союзуна таанылган. Борис Хмельницкий белгилүү актёрлордун арасынан жалгыз бильярд боюнча спорт чебери болгон жана совет кинематографынын эң келишимдүү актёрлорунун бири болуп эсептелет. 1982-жылы Голливудга барып, актёр Кларк Дуглас ага 1 миллион доллар гонорар төлөнө турган "Скалолаз" тасмасындагы ролду сунуштаган. Бирок совет бийлиги актёрду бул мүмкүнчүлүктөн ажыраткан. Б.Хмельницкий жалпысынан 64 тасмада роль жараткан.

1975-жылы актриса Марианна Вертинскаяга баш кошуп, Дарья аттуу кыздуу болушкан. Кызы дагы актрисалык кесипти тандап алган. 1981-жылы актёр жубайы менен ажырашкан.

16-февралга карата жылнаама

Автор: Саадат Токтоболот кызы