ЖЫЛНААМА, 20-АПРЕЛЬ: Америкалык модель, актриса, ырчы жана бийчи Кармен Электра 45 жашка толду

Америкалык модель, актриса, ырчы жана бийчи Кармен Электра 45 жашка толду. Ал Огайо штатындагы Шеронвиллде төрөлгөн. Анын өзүнүн аты Тара Ли Патрик. 9 жашынан баштап бий мектебине бара баштаган. Өзүнүн карьерасын 1990-жылы Огайодогу "It’s Magic" аттуу шоудо бийчи катары баштаган. 1991-жылы Калифорнияга көчүп келип, "Paisley Park Records" менен келишим түзүп ырчылык карьерасын баштаган. Дал ошол кезде атын Кармен Электрага алмаштырган. Чогуу иштешкен Принс аттуу ырчынын "Glam Slam" түнкү клубунда бийчи болуп иштеген. 1995-жылдан баштап ар кандай телеберүүлөргө чыга баштаган. 1996-жылы май айында атактуу болгон "Playboy" журналына сүрөттөрү чыккан соң ал атактуулукка жетип, "Малибу куткаруучулары" (Спасатели Малибу) сериалына тартылган. Аталган журналга дагы 4 жолу чыкканга жетишкен. Андан соң дагы бир нече комедия жанрындагы тасмаларга тартылган. 1999-жылдан тарта клиптерге тартылып, стриптиз бийин бийлеп ар кандай шоулорго катышкан. 2002, 2005, 2006, 2007-жылдары "Дүйнөнүн сексуалдуу айымдары" тизмесинде алдынкы орундарга ээ болгон.

2006-жылы экинчи пландагы эң начар ролу үчүн "Алтын малина" (Золотая малина) менен сыйланган. 2004-жылы "MTV Movie Awards" сыйлыгын "Кыйраткыч түгөйлөр: Старски жана Хатч" (Убойная парочка: Старски и Хатч) тасмасында мыкты өбүшкөнү үчүн алган. 2002-жылы Кармен Электранын атынан жок болуп кеткен курттардын түрүн "Carmenelectra shechisme" деп аташкан.

Чыгармачылыктан тышкары Кармен Электра көптөгөн кайрымдуулук иш-чараларды уюштуруп, мээнин шишиги менен жабыркагандарга, Паркинсонизм оорусуна чалдыккандарга, бала кезинде зордук-зомбулукка кабылгандарга жардам көрсөтүп келет.

20-апрелдин жылнаамасы.

Автор: Турсунай Алымкулова
Фото: Интернеттен алынган