ЖЫЛНААМА, 25-АПРЕЛЬ: Легендарлуу футболчу, машыктыруучу Йохан Кройф көзү тирүү болгондо 70 жашка толмок

Легендарлуу футболчу жана машыктыруучу Йохан Кройф көзү тирүү болгондо 70 жашка толмок. Ал 1947-жылы 25-апрелде Нидерландынын Амстердам шаарында туулган. “Аякс” футболдук клубунун футболдук академиясын жыйынтыктаган Кройф кезинде Голландия курама командасынын лидерине айланып, бир катар мелдештерде алдынкы оюнчу катары команданы ийгиликтерге жетишкен. Курама команда менен ал 1974-жылкы Дүйнө чемпиондугунда күмүш медаль тагынса, 1976-жылкы Европа чемпиондугунда 3-орунду ээлеп, коло медаль тагынган. Голландиянын формасы менен майданга 48 ирет чыгып, 33 ирет айырмаланган. Футболчу катары карьерасында голландиялык (“Аякс”, “Фейенорд”), испаниялык (“Барселона”, “Леванте”) жана америкалык клубдарда (“Лос-Анжелес Ацтекс”, “Вашингтон Дипломатс”) ойногон. 1965-жылдан баштап 1984-жылы аяктаган клубдук карьерасында Голландиянын чемпиондугун 9 ирет, испаниянын чемпиондугун бир ирет утуп алган.

Карьерасын жыйынтыктаган соң машыктыруучулук менен алектенип баштаган. 1989-1996-жылдар аралыгында ал машыктыруучу катары каталондук “Барселона” менен Испания чемпиондугун 4 ирет (1991-1994-жылдар аралыгы), Европа Чемпиондорунун Кубогун 1 ирет (Азыркы Чемпиондор Лигасы, 1992) уткан. 2003-жылы УЕФА добуш берүүнүн негизинде акыркы 50 жылдагы Голландиянын мыкты футболчусу деп табылган. 2007-жылы “Аякс” клубу Кройф ойногон 14-номурдагы футболканы мындан кийин бир дагы футболчуга кийгизбей, анын урматына сактап коюуну чечкен.

Машыктыруучу катары ал учурда “Барселона” ойноп жаткан “тики-така” системи менен таанылган. “Футбол бул эң жөнөкөй оюн. 50 метр аралыкка пас берип, топту каршылаш командага тарттырып жиберүү коркунучунда калгандан көрө жакындагы өнөктөштөр менен топ алышып-беришип, топту командада сактап калуу маанилүү”, - деген ал бул тууралуу.

Легендарлуу футболчу 2016-жылы 24-мартта узак оорудан улам каза болгон.

25-апрелдин жылнаамасы.

Автор: Турсунай Алымкулова