Өзгөн-Кара-Шоро жолунда мал айдап баратып аты менен дарыяга түшүп кеткен тургунду издөө иштери токтотулду. Бул тууралуу бүгүн, 5-июнда Өзгөчө кырдаалдар министрлигинин басма сөз кызматынан билдиришти.
"Жазы дарыясына аты менен түшүп кеткен тургунду ӨКМнын Республикалык өзүнчө куткаруу отрядынын куткаруучулары издөө иштерин жүргүзүшкөн. Бирок натыйжа болбогондуктан издөө иштери токтотулду", - деп билдирди басма сөз кызматы.
Маалыматка ылайык, Мырзаке айыл аймагындагы Адыр айылынын 1950-жылы туулган А.Т. аттуу тургуну Өзгөн-Кара-Шоро жолунун 57-чакырымында мал айдап бара жатып аты менен кошо Жазы дарыясына түшүп кеткен. Окуя үстүбүздөгү жылдын 20-май күнү саат 17:00 чамасында орун алган.