ЖЫЛНААМА, 11-ИЮНЬ: Белорус ырчысы Дмитрий Колдун 32 жашка толду

Белорус ырчысы, “Жылдыздар фабрикасы-6” долбоорунун жеңүүчүсү Дмитрий Колдун 1985-жылы 11-июнда Минск шаарында туулган. Келечектеги ырчынын ата-энеси мектеп мугалимдери болсо Колдун өзү бала чагынан тартып врач болууну кыялданган. Ошол себептен ал өспүрүм курагында эле Минск гимназиясындагы медициналык атайын класска кирип окуп калган. Мектепти ал күмүш медаль менен аяктайт. Кичине кезинде эле Дмитрий ар тараптан таланттуу келип, "Пёс Полкан — приятель Пети" ("Петянын досу - дөбөт Полкан") адабий аңгемесин жазат. Аңгеменин өзгөчөлүгү - андагы бардык 66 сөз жалаң "П" тамгасынан башталгандыгында. Кийинчерээк Колдундун бул аңгемеси Белорусиянын белгилүү гезиттеринин бириндеги "Рекорддор" бөлүмүнө да жарыяланган.

Дмитрий Колдун Белорусия мамлекеттик университетинде химия илими боюнча билим алган. Бирок окуусун таштап, чыгармачылыкка бет алган. 2004-жылы "Элдик артист-2" теледолбооруна катышып орун албай калган, бирок көрүүчүлөрдүн сүймөнчүгүнө ээ болгон.

2007-жылы "Евровидение" сынагында Белорусиянын атынан "Work Your Magic" аттуу ыры менен чыккан. Өлкөсүнүн тарыхында алгачкы жолу Белорусияны финалга алып чыгып 6-орунду алган ырчы Дмитрий Колдун болгон.

11-июнга карата жылнаама.

Автор: Гүлжан Асанкожоева