ЖЫЛНААМА, 2-ИЮЛЬ: "Заманыбыздын супер алпаруучусу" Нурзат Токтосунова туулган күнүн 46 градус ысыкта тосуп жатат

Бүгүн, 2-июлда "Супер-Инфо" гезитинин тандоосу боюнча "Заманыбыздын супер алпаруучусу" наамынын ээси Нурзат Токтосунова 34 жашка чыкты. Аны өздүк майрамы менен куттуктап, каалоо-тилектерибизди айтып байланышка чыктык. Нурзат Токтосунова учурда Түркиянын Шанлыурфа шаарында экенин айтты. Бүгүнкү туулган күнүндө аны көпчүлүк интернет аркылуу куттуктап, айрымдары күлкүлүү видеолорду жиберсе, кээ бири ага байланыша албай, белектерди кайсы дарекке салуу керектигин сурап жатышканын кошумчалады.

"Негизи туулган күнүмдү Бишкектен эле гавайи стилинде өткөрүүнү ойлонуп, коноктордун ар биринин моюнуна илинчү гүл жасалгаларын да жасап баштаганбыз. Тилекке каршы, Түркияга жумуштап учууга туура келди. Жолдошум (ред. Максат Надырбеков) да келмек, бирок 4-5 күнгө, анын ичинде 2 күндү жолго кетиргиси келбей, эмкиде экөөбүз 2 жумага келе турган болуп Бишкекте калды. Учурда күн 46 градус ысык, эшикке чыкканга мүмкүн эмес болуп жатат.

Туулган күнүм менен ким биринчи куттуктаганын билбей калдым. Баары эле социалдык тармак, WhatsApp аркылуу куттуктап, боорду эзген видеолорду жөнөтүп жатышат. Максат ата-энелерибиз куттуктаган видеолорду жиберип сюрприз жасады, аябай жакты. Бир досум "Таңкы 5тен бери чалып ала албай жатам, гүлдү кайсы дарекке жиберейин?" деп жазып жибериптир (күлүп), ушундай учурларда ыңгайсыздык болуп жатат, бирок интернет аркылуу да куттуктоолорду алуу мага жакты. Туугандарыма, досторума ыраазы болуп жатам", - деди Нурзат Токтосунова.

Нурзат Токтосунова Ысык-Көл облусунун Түп районундагы Ичке-Суу айылында төрөлгөн. Мектепти ийгиликтүү аяктап, олимпиаданын жыйынтыгы менен эл аралык Ататүрк-Ала-Тоо университетине сынаксыз кабыл алынып, эл аралык мамилелер бөлүмүн окуп бүтүргөн. Кийин Б.Бейшеналиева атындагы искусство институтунун "Маданий ишмердүүлүк" факультетин аяктаган.

"Курманжан датканын 200 жылдыгы", "Уркуя Салиеванын 100 жылдыгы", "Куйручуктун 145 жылдыгы", "Эгемендүүлүктүн 20 жылдыгы", "Исхак Раззаковдун 100 жылдыгы", "Ысык-Көлдө кадыр түн-2010, 2011, 2012", "Супер-Инфо" гезити тарабынан уюштурулган "Супер концерт" ж.б. ушул сыяктуу көптөгөн иш-чараларды алып барган.

Автор: Үмүт Абдраимова
Фото: Нурзат Токтосунова