Нарындын үч районунда сел жүрүп, 10 үйдү суу каптады

9-10-июлда Нарын облусунун үч районунда сел жүргөнүн, анын кесепетинен 10 үйдү суу каптаганын Өзгөчө кырдаалдар министрлигинин маалымат кызматы билдирди. Маалым болгондой, сел Нарын, Жумгал, Ак-Талаа райондорунда жүргөн.

Нарын районунда саат 19:30 чамасында катуу жааган жамгырдын кесепетинен колоттордон агып түшкөн сел суулары Куланак айылынын Он-Сарай участкасында 3 турак жайдын короосун жана Терек-Суу участкасында 3 турак жайдын короосун каптаган.

Жумгал районунда саат 16:40 чамасында катуу жааган жамгырдын кесепетинен колоттордон агып түшкөн сел суулары Сары-Байтал жана Шилбили участкаларында айдоо аянттарындагы айыл-чарба өсүмдүктөрүн жана көп жылдык чөптөрүн каптаган.

Ак-Талаа районунда 10-июль күнү саат 2:40 чамасында Үгүт айылында катуу нөшөрлүү жамгырдан кесепетинен кыян суулары, айылдын сел өткөрүүчү каналына батпай, Акматов көчөсүндөгү 4 турак жайдын короолоруна сел суулары кирген.

Атайын түзүлгөн комиссия жана куткаруу кызматтары тарабынан селдин кесепеттерин жоюу боюнча тийиштүү аракеттер көрүлүп жатканы кабарланды. Сел суулары адам өмүрүнө зыян тийгизген эмес.

Автор: Жамалидин Парманкулов
Фото: Интернеттен алынды