"Лейлек" чакан ГЭСин "Кыргыз Каганат" ишканасы курат. Келишимге Өнөр жай, энергетика жана жер казынасын пайдалануу комитетинин төрагасы Дүйшөнбек Зилалиев менен аталган ишкананын жетекчиси Айжигит Апсатар уулу кол койгонун мекеменин маалымат кызматы кабарлады.
Маалым болгондой, буга чейин 14 ГЭСти куруу боюнча тендер жарыяланып, анын ичинен 11 ГЭСти курууга 6 ишкана катышкан. "Кыргыз Каганат" ишканасы "Лейлек" ГЭСин курууну утса, калган 10 ГЭСти курууну Чехиянын "Liglass Trading CZ. SRO" ишканасы уткан. "Кыргыз Каганат" ишканасы ГЭСтин курулушун талапка ылайык, 2 айга жетпеген убакытта баштап, 3 жылдын ичинде пайдаланууга берүүсү керек. ГЭСтин кубаттуулугу 10 мВт болот.