"ЭЛДИК КАБАРга" жооп: Кара-Кулжа-Алайкуу жолуна түшкөн таштардын көлөмү чоң болгондуктан, аларды жардыруу керек

Кара-Кулжа-Алайкуу жолунун Ой-Тал айылындагы тилкесине түшкөн таштардын көлөмү өтө чоң болгондуктан, аларды жардыруу керек. Бул тууралуу 16-июлда SUPER.KG`ге Жол чарба департаментинин Бишкек-Ош унаа жолундагы №26-жол тейлөө ишканасынын жетекчиси Бактыбек Аттокуров билдирди.

"Апрель айында кулаган таштар жолду бууп калган, дароо жолду ачуу иштерин баштаганбыз. Ал таштардын айрымдары 100 тоннадан ашык, биздин техниканын күчү жетпегендиктен чоң таштар калып калган. Бирок жолго түшкөн таштардын негизги бөлүгү тазаланып, жол ачылган. Азыр жолдун туурасы 5 метрди түзөт. Жүк ташыган унаалар да өтүп жатат. Ал жердеги 3 ташты жардырууга компаниялардын баргысы келбейт экен. Буга чейин эки жолу ошол таштарды жардыруу үчүн тендер өткөрдүк, эч ким катышпай койду", - дейт Аттокуров.

Учурда аталган таштарды жардыруу боюнча сүйлөшүү жүрүп жатканын кошумчалады.

Эскерте кетсек, буга чейин окурман "Кара-Кулжа-Алайкуу жолунун Ой-Тал айылында ушул жылдын 24-апрель күнү көлөмү чоң таш түшүп, жолду бууп калган. Ошол күндөн ушул күнгө чейин жакшы тазаланбай жеңил унаа өтүп, бирок чоң жүк ташуучу унаалар өтө албай жатат", - деп билдирген.

Автор: Кенжебай Сатканалиев