ЖЫЛНААМА, 24-ИЮЛЬ: Америкалык ырчы жана актриса Женнифер Лопес 48 жашка толду

Женнифер Лопес

Балдары жана алардын атасы Марк Энтони менен

Учурдагы сүйүктүүсү Алекс Родригес менен

Теги пуэрто-рикалык болгон америкалык ырчы, актриса Женнифер Лопес 1969-жылы 24-июлда Нью-Йоркто туулган. Дүйнөгө атагы чыккан америкалык актрисанын балалык күндөрү бий менен байланышкан. 7 жашында бий өнөрүн мыкты өздөштүргөн Женни эки жылдан кийин чоң концерттерге катышып, апасын сүйүнткөн. Ырчылык карьерасын 1987-жылы баштап, бир канча музыкалык сынактардын жеңүүчүсү аталган. 2013-жылы Голливуддун Даңк аллеясындагы жылдыздардын бирине аты жазылган.

Лопес чыгармачылыктан сырткары бизнес менен да алектенет. Ал 2012-жылы ресторан ачса, 2015-жылдан тарта айымдарга арналган кийимдерди жана парфюмдарды чыгарып келет.

Актрисанын жеке жашоосу коомчулукка жана жалпыга маалымдоо кызматтарына кенен жайылган. Ал 1997-1998-жылдары ошол кезде Майамиде тейлөөчү болуп иштеген Охани Ноа менен үй-бүлө куруп, бирге жашаган. 1999-жылы америкалык рэпер Жон Комбс менен сүйүү мамилесинде болсо, 2001-2002-жылдары Крис Жадд аттуу бийчи менен никеге турган. 2002-жылы Бен Аффлек деген актёр менен мамиле куруп, 2004-жылы Марк Энтониге турмушка чыккан. 2008-жылы экөө Макс жана Эмми аттуу эгиз балдардын ата-энеси болушкан. Тилекке каршы, үй-бүлө очогу көпкө тутанбай 2014-жылы түгөйлөр ажырашып кетишкен. Андан соң Каспер Смарт жана рэпер Дрейк менен мамиле курган. 2017-жылдын март айынан тарта бейсболчу Алекс Родригес менен кыз-жигиттик мамиледе.

24-июлдун жылнаамасы.

Автор: Наргиза Талантбекова
Фото: Интернеттен алынды