ИИМ: "Бишкекте Кытай ресторанын карактап, “Альфа-Секьюрити” ишканасынан курал уурдоону уюштурган адам кармалды"

Маалыматка ылайык, эл аралык издөө жарыяланган Жылдызбек Бекмурзаев 21-июль күнү Казакстандын Костанай облусунда саат 01:30дар чамасында атайын топ тарабынан кармалган.

Андан сырткары аталган маалыматта шектүү 1986-жылы Талас облусунда төрөлгөнү, учурда Казакстандын Костанай облусунда убактылуу кармоочу жайда кармалып, Кыргыз мамлекетине экстрадициялоо иштери жүрүп жатканы айтылат.

Эске салсак, үстүбүздөгү жылдын 6-февраль күнү Бишкектеги "Цзи Сян" Кытай ресторанына куралчан белгисиз адамдар кирип келишип, кассадагы 100 миң сомду алып кетишкен. Бул фактынын негизинде иликтөө иштери жүрүп, кылмышка шектүү катары 1991-жылы туулган Э. уулу У. кармалган. Анын Көк-Жар жаңы конушундагы үйүнөн эки тапанча жана 97 миң сом далил зат катары алынган.

Тергөөнүн жүрүшүндө Э. уулу У. 27-апрель күнү Ж.Б. жана А.Ж. аттуу жарандар менен бирге “Альфа-Секьюрити” ишканасына киришип, ири көлөмдөгү ок атуучу курал уурдап кетишкени белгилүү болгон.

Андан сырткары ошол эле кылмыштуу топ 5-май күнү лифт оңдогон ишканага киришип, 285 миң сом, 30-май күнү Карасаев көчөсүндөгү дагы бир ишканадан 396 миң сом уурдап кетишкен.

Атайын жүргүзүлгөн операциялардын негизинде кылмышка шектүү катары 1989-жылы туулган М.Э., 1984-жылы туулган А.Ж. жана 1989-жылы туулган С.Б. кармалган. Ошондой эле 19-июнь күнү Аламүдүн районунун Бектоо тилкесинде “Альфа-Секьюрити” ишканасынан уурдалган куралдар табылган.

Тергөөнүн жүрүшүндө жогорудагы кылмыштардын уюштуруучусу 1986-жылы туулган Жылдызбек Бекмурзаев экени аныкталып, издөөгө алынган.

Автор: Кенжебай Сатканалиев
Фото: ИИМдин басма сөз кызматы