Актёр Жорж Клуни жакында төрөлгөн эгиз балдарынын сүрөтүн жарыялап жиберген журналды сотко берет

Америкалык белгилүү актёр Жорж Клуни франциялык Voici журналын сотко берет. Мындай маалыматты жергиликтүү жалпыга маалымдоочу каражаттар жазып чыгышты.

"Аталган журнал актёрдун июнь айында төрөлгөн эгиз балдарынын сүрөтүн уруксаты жок жарыялап жиберген. Ошол себептен актёр аларга мыйзам чегинде чара көрүүнү чечкен", - деп жазылат маалыматтарда.

"Өткөн аптада Voici журналынын фотографтары биздин короодон ашып өтүшүп, бакка чыгып алып бөлмөдө жаткан балдарыбызды сүрөткө тартышыптыр. Биздин балдарыбыздын коопсуздугу үчүн фотографтар, агенттик жана редакция мыйзамдын негизинде жоопко тартылышат", - деп жазган актёр билдирүүсүндө.

Журналга актёрдун жубайы жана балдары менен Италиядагы хансарайында тартылган сүрөтү жарыяланган. Жорж Клуни менен анын жубайы Амаль Аламуддин буга чейин жаңы төрөлгөн балдарынын сүрөтүн эч бир жерге жарыялаша элек болчу.

Эскерте кетсек, жубайлар өткөн июнь айынын 6сында эгиз кыз жана уулдуу болушкан. 56 жашка чыкканда алгачкы жолу ата статусуна ээ болгон актёрду коомчулукта күйөрмандары кызуу куттукташкан.

Автор: Гүлжан Асанкожоева
Фото: Интернеттен алынды