Сотто Дүйшөнкул Чотонов көрсөтмө бере баштады

Бүгүн, 7-августта Бишкек шаарынын Биринчи Май райондук сотунда Өмүрбек Текебаев менен Дүйшөнкул Чотоновдун иши боюнча соттук отурум уланды. Отурумдун жүрүшүндө экс-элчи Дүйшөнкул Чотонов көрсөтмө бере баштады.

Анын айтымында, 13-май күнү Маевский жана Модин менен жолугушкан эмес.

"13-май күнү түштөн кийин Ошто коомдук абал өзгөргөнү боюнча маалымат берилип, Исмаил Исаков экөөбүз учуп кеткенбиз. Кечинде эл менен сүйлөшүп, облустук администрацияны бошоттук. Ал ортодо жолугушуу болуп, ага Сооронбай Жээнбеков, Бектур Асанов, Айтмамат Кадырбаев, Исмаил Исаков жана мен катышкам. Маевский жана Модин менен жолугушкан эмесмин", - деди Чотонов.

Эскерте кетсек, 2017-жылдын 25-февралында Кыргыз Республикасынын Башкы прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүлүп берилген. 26-февралда козголгон кылмыш ишинин алкагында Текебаев менен Чотонов камалган.

Башкы көзөмөл органдын маалыматы боюнча аларга орусиялык ишкер Леонид Маевскийдин арызынын негизинде иш козголгон. Маевский өз арызында Текебаев "Мегаком" иши боюнча 1 миллион доллар алып, аны кайтарбай койгонун айткан.

Автор: Жамалидин Парманкулов