Күрөш боюнча кадеттер арасында Дүйнө чемпиондугу: Акылбек Талантбеков коло медалдын ээси болду

Грециянын Афина шаарында өтүп жаткан грек-рим күрөшү боюнча кадеттер арасындагы Дүйнө чемпиондугунда Акылбек Талантбеков коло медалды багындырды.

Аталган мелдеште коло медаль үчүн беттеште Акылбек Талантбеков финляндиялык Отто Кетоненго туш келген. Анда Кыргыз балбаны 4 мүнөттүк беттештин жыйынтыгында 6 упай топтоп жеңишке жетти. Ал эми финляндиялык балбан 1 упайга гана ээ боло алган.

Бул жеңиш менен Акылбек Талантбеков аталган мелдеште Кыргыз өлкөсүнүн капчыгына алгачкы медалды алып келди.

Буга чейин жарым финалда Талантбеков ирандык балбанга туш келип 2:0 эсеби менен жеңилип калган.

Автор: Нурсултан Нурболот уулу
Фото: Интернеттен алынды