Монополияга каршы жөнгө салуу агенттиги: "Өлкөнүн түштүгү менен түндүгүндө цементтин баасында олуттуу айырмачылык болууда"

Өлкөнүн түштүк жана түндүк аймагында М-400 үлгүсүндөгү цементтин баасында олуттуу айырмачылык болууда. Бул тууралуу бүгүн, 14-сентябрда Кыргыз Республикасынын өкмөтүнө караштуу Монополияга каршы жөнгө салуу мамлекеттик агенттигинин басма сөз кызматынан билдиришти.

Маалыматка ылайык, июль айынын аягындагы иликтөөнүн жыйынтыгында Баткен облусунун Кызыл-Кыя шаарындагы "Түштүк кыргыз цемент" заводунун өндүрүшүнөн чыккан цементтин баасы түштүктө 285-300 сомго бааланууда. Ал эми ошол эле цемент өлкөнүн түндүк аймагында 240-270 сомдон сатылып, айырмасы 30-40 сом болуп жатканы белгилүү болгон. Учурда Кызыл-Кыя шаарынан өлкөнүн түндүк аймагына 1 кап цементти жеткирүү 50-75 сом болууда.

Мындан улам Монополияга каршы жөнгө салуу мамлекеттик агенттиги "Түштүк кыргыз цемент" ААКсына монополияга каршы мыйзам бузулуп жатканы боюнча маалым кат жиберген.

Автор: Акназар Сулайманкулов
Фото: Интернеттен алынды