Жабык имараттагы Азия оюндары: Кыргыз самбочулар 1 күмүш жана 1 коло медаль жеңип алышты

Түркмөнстандын Ашхабад шаарында 17-27-сентябрь аралыгында өтүп жаткан уруш түрлөрү боюнча жабык имараттагы V Азия оюндарында самбочу Айткүл Абдылдабек кызы күмүш медалын жеңип алды.

Айткүл Абдылдабек кызы 48 килограммга чейинки салмак ченинде күч сынашып жарым финалда казакстандык Жадыра Пайызга туш келип 6:0 эсебинде жеңип алган. Финалда Кыргыз самбочу казакстандык Айжан Жылкыбаева менен кез келип 3:0 эсебинде жеңилип калды. Бул жыйынтык менен Айткүл Абдылдабек кызы күмүш медалын тагынып, Кыргыз капчыгына 14-күмүш медалды алып келди.

Тилек Аманкулов 52 килограммга чейинки салмак ченинде күрөшүп, алгачкы беттеште казакстандык балбанга жеңилип калган. Биринчи көңүл жубатуучу беттеште таиланддык спортчунун үстүнөн жеңишке жеткен. Коло медаль үчүн күрөштө Тилек Аманкулов өзбекстандык Саттор Эргашевге туш келген. Беттештин жыйынтыгында Кыргыз самбочу 7:1 эсеби менен жеңип коло медалга ээ болду.

Муну менен Кыргыз өлкөсүнүн капчыгында жалпы 43 медаль болду, анын ичинен 6 алтын 14 күмүш жана 23 коло медаль. Жалпы медалдык эсепте Кыргыз өлкөсү 10-орунда жайгашууда.

Автор: Нурсултан Нурболот уулу
Фото: Интернеттен алынган