Испаниядагы Каталония аймагы көз карандысыздыкка ээ болсо, "Барселона" футбол клубу Англия чемпионатында ойноп калышы мүмкүн

Эгерде Испаниядагы Каталония аймагы көз карандысыздыкка ээ болсо, "Барселона" футбол клубу Англия же Франциянын чемпионатында ойноп калышы мүмкүн. Бул тууралуу чет элдик маалымат каражаттары жазып чыгышты.

Каталониянын спорт департаментинин башчысы Жерар Фиерас каталондук клубдар өз тагдырын өздөрү чечүүгө укуктуу экенин билдирди.

"Эгерде Каталония көз карандысыздыкка ээ болсо, анда "Барселона", "Эспаньол" жана "Жирона" клубдары кайсы жакта ойноорун өздөрү чечиши керек. Балким, алар Испания, Англия, Франция же Италия чемпионатын тандашат", - деди Жерар Фиерас.

Испания мамлекети референдум мыйзамсыз экенин жана анын жыйынтыктарын тааныбай тургандыгын жарыялашты. Анткени өлкөнүн мыйзамына ылайык, мамлекеттин кайсы бир аймагынын бөлүнүшү жалпы испаниялык шайлоо менен чечилиши керек.

Бул тууралуу өзүнүн оюн "Барселона" футбол клубунун оюнчусу Жерар Пикке Твиттердеги өздүк баракчасына калтырган. "Каталониянын жашоочуларынын референдумга болгон укугун колдойм, бул алардын демократиялык укугу. Бирок Испания үчүн ойногонго дайым даярмын", - деп жазган билдирүүсүндө.

Испания өлкөсүндөгү Каталония аймагынын көз карандысыздыгы үчүн референдум 1-октябрда өтөт.

Автор: Айзада Тураркулова