Роналдунун 4-баласын күтүп жаткан Родригес сезимдери тууралуу көпчүлүк менен бөлүштү

Кош бойлуу Жоржина Родригес Криштиану Роналдуну жана анын балдарын сүйөрүн көпчүлүккө билдирди. Ал бул тууралуу социалдык тармактагы өздүк баракчасына жазды.

2016-жылдан тартып испаниялык бийчи, модель Жоржина Родригес менен футболчу Роналду кыз-жигит мамилесинде деген маалыматтар тарай баштаган. Учурда Родригес Роналдунун 4-баласын күтүп жатат.

Буга чейин 2010-жылы футболчунун тун уулу төрөлүп, анын энеси эч кимге жарыяланган эмес. Роналду жалпыга маалымдоо каражаттарына уулун карын эне төрөдү деп билдирген. Ушул жылдын июнь айында Роналду эгиз балалуу болуп, бул жолу да балдарды карын эне төрөгөнүн айткан.

Учурда ал сүйгөн кызы Жоржина жана 3 баласы менен чогуу жашап, түгөйлөр балдары менен чогуу түшкөн сүрөттөрүн интернетке жүктөп турат.

Өзүнүн акыркы бөлүшкөн сүрөтүндө Жоржина: "Ашыкча сөз жазбайм. Силерди сүйөм", - деп билдирүү калтырган. Модель мурунку берген интервьюларында ал үчүн үй-бүлө баарынан маанилүү экенин айткан.

"Мен балдарды, жаныбарларды жана жаратылышты жакшы көрөм. Алдыга умтулууга жардам берген адамдар мени курчап туруусун каалайм", - деген ал.

Сулуунун дал ушул сапаттары Роналдуну арбап алгандай. Чет элдик маалымат каражаттары кабарлагандай, түгөйлөр 2018-жылдын жай айларында үйлөнүүнү пландашууда.

Буга чейин Криштиану 7 балалуу болууну каалагандыгын билдирген.

Автор: Айзада Тураркулова