Италиялык жөө күлүк атаандаштарынын катасынан улам Венеция марафонун жеңип алды

Италиялык жөө күлүк Эйоб Фаниэль атаандаштары жолдон адашып калганы үчүн венециялык марафонду жеңип алды. Бул тууралуу жеңил атлетика федерацияларынын эл аралык ассоциациясы маалымдайт.

Мелдештин жүрүшүндө 7 спортчудан турган лидерлик топ пайда болгон, алар артта келе жаткан атаандаштарынан 1 мүнөткө алдыга келе жатышкан. 25 чакырымдагы аралыкта жол көрсөтүп жаткан мотоциклдин артынан ээрчип бараткан лидерлик топ туура эмес бурулуп кеткен. Кайрадан туура жолго келиш үчүн атлеттер 1 мүнөт коротту. Бул себептен Эйоб Фаниэль 1 мүнөттүк фора алып, 2 саат 12 мүнөт жана 16 секунд жыйынтыгы менен жеңүүчү болду.

Бул жыйынтык менен Эйоб Фаниэль 1995-жылдан бери венециялык марафондо жеңишке жеткен алгачкы италиялык спортчу болду.

Венеция марафону 1986-жылдан баштап жыл сайын өткөрүлөт.

Автор: Нурсултан Нурболот уулу
Фото: Интернеттен алынган