Малайзияда балык уулап жүргөн адамды крокодил жеп кетти

Малайзияда адамдар көбүнчө "таажылуу крокодилдердин" курмандыгы болушат.

Малайзияда крокодил бир адамды жеп кетти. Бул тууралуу чет элдик маалымат каражаттары жазат.

Маалыматка ылайык, Малайзиянын Сабах штатында куткаруучулар крокодил жеп кеткен адамдын денесинин калдыктарын табышкан. Каза болгон киши 5-ноябрда балык кармоо үчүн кетип, ошол бойдон кайтып келген эмес. Күбөлөрдүн айтымында, кишини крокодил сүйрөп кеткен. Куткаруучулар 2 күн бою издөө иштерин жүргүзүшкөн, аягында окуя болгон жерден 7 чакырым алыс жерден анын денесинин калдыктарын табышкан.

Расмий маалыматка караганда, 2010-жылдан 2016-жылга чейин Малайзияда крокодилдердин кол салуусунан 27 адам өлгөн. Каза болгон адамдардын көбүнчөсү таажылуу крокодилдердин курмандыгы болушкан.

Таажылуу крокодилдер - дүйнө жүзүндөгү эң чоң жырткычтардын бири болуп эсептелет. Алардын узундугу 7 метрге чейин жетсе, салмагы 2 тоннадан ашат.

Автор: Айзада Тураркулова