Күбө: "Чүйдө жүргүнчүнү жеңил унаа сүзүп, ал алган жаракатынан ошол жерден каза болду"

Ош-Бишкек унаа жолунда жөө жүргүнчүнү жеңил унаа сүзүп, ал ошол жерде алган жаракатынан улам каза тапты. Бул тууралуу бүгүн, 22-ноябрда SUPER.KG порталына окуянын күбөсү билдирди.

Анын айтуусуна караганда, жол кырсыгы кечээ, 21-ноябрда саат 19:30дар чамасында болгон.

"Ош-Бишкек унаа жолунун Чүй облусунун Жайыл районуна караштуу Бекитай айылындагы бөлүгүндө Төө-Ашуу тараптан келе жаткан Mercedes-Benz үлгүсүндөгү жеңил унаа 50-55 жаштардагы адамды сүзүп кетти. Ал адам алган жаракатынан улам ошол жерден каза болгон", - дейт күбө.

Аталган окуя тууралуу Чүй облусундагы Патрулдук милиция бөлүмүнөн окуя катталганын тастыктап, каза болгон жарандын аты-жөнү такталып жатканын, унаанын айдоочусу 24 жашта экенин билдиришти.

Ошондой эле учурда керектүү экспертизалар дайындалып унаасы айып аянтчасына коюлганын кошумчалашты.

Автор: Кенжебай Сатканалиев