Токмокто жаңы төрөлгөн ымыркайды таштагандар табыла элек

Токмок шаарында жаңы төрөлгөн ымыркайды көчөгө таштап кеткен адамдар табыла элек. Бул тууралуу Чүй облустук милициясынын маалымат кызматы билдирди.

Маалыматка караганда, окуя боюнча Кылмыш-жаза кодексинин 121-беренесине ылайык ("Кишини коркунуч абалында калтыруу") кылмыш иши козголду. Учурда шаардагы чиркөөгө жакын жерге ташталган европа түспөлүндөгү жаңы төрөлгөн ымыркайдын ата-энесин издөө иштери уланып жатат. Табылган кыз азыркы тапта Токмок шаардык балдар ооруканасында дарыгерлердин көзөмөлүндө.

Эске салсак, ымыркай 22-ноябрда саат 17:00дөр чамасында табылган. Шаардагы Охотничья көчөсүнөн жаңы төрөлгөн ымыркайды көргөн жергиликтүү тургундар милицияга кабар беришкен. Табылган ымыркай кыздын салмагы 3 килограмм 400 грамм болгон.

Автор: Кызжибек Раимова