"Күүгүм" тасмасы аркылуу таанымал америкалык актёр Келлан Латс бойдокчулук менен коштошту

Келлан Латс жана Бриттани Гонсалес

"Күүгүм" тасмасындагы Эммет Каллендин ролу менен таанымал америкалык актёр Келлан Латс бойдокчулук менен коштошуп, сүйүктүүсү Бриттани Гонсалес менен үй-бүлө курду. Бул маалыматты Гонсалес өзү интернеттеги социалдык тармактагы жеке баракчасы аркылуу сүйүнчүлөгөн.

"Бул жыл мен үчүн өзгөчө. Анткени жаңы жашоо башталды. Жолдошум менен бирге кадам шилтеген жаңы үй-бүлөлүк жашоо", - деген ал.

Белгилей кетсек, түгөйлөр 1 жылдан ашуун убакыт кыз-жигит болуп сүйлөшүп жүрүп, 2 ай мурун актёр сүйүктүүсүнө үйлөнүү сунушун киргизген. Чет элдик басылмалардын жазып чыкканына таянсак, заманбап үлпөт той жакынкы күндөрү Пуэрто-Рико же Гавайиде өтмөкчү.

Автор: Наргиза Талантбекова