Лионель Месси "Барселона" футбол клубу менен келишимди узартты

Испандык "Барселона" футбол клубунун жылдызы Лионель Месси клуб менен келишимин узартты. Бул тууралуу чет өлкөлүк басылмалар жазып чыгышты.

Маалыматка ылайык, жаңы келишим 2021-жылга чейин түзүлгөн. Анын негизинде Лионель Мессини келишим бүткөнчө сатып алуу 700 миллион еврого бааланган.

Буга чейин "Барселона" клубу аргентиналык футболчу менен мөөнөтсүз келишим түзүүгө даяр турганын билдирген.

Маалымдай кетсек, Месси "Барселона" клубунда 2004-жылдан баштап ойноп келүүдө. Азыркы убакытка чейин жалпы 602 беттешке катышып, 523 гол киргизген.

Эске салсак, 2017-жылдын жайкы трансферлер убагында "ПСЖ" футболдук клубу "Барселона" клубунун оюнчусу Неймарды келишими бүткөнчө 222 миллион еврого сатып алган.

Автор: Нурсултан Нурболот уулу
Фото: Интернеттен алынган