Сокулукта абактан качкандардын төртүнчүсү кармалды

Чүй облусунун Сокулук РИИБинин камагынан качып кеткендердин төртүнчүсү кармалды. Бул тууралуу SUPER.KG'ге бүгүн, 1-декабрда Чүй ОИИББинин басма сөз кызматынын ага тескөөчүсү Нурбек Токтосунов кабарлады.

Анын айтымында, абактан качкандардын дагы бири 28 жаштагы Кайрат Жанботоев бүгүн, 1-декабрда таңкы саат 4 чамасында Чүй облусунун Москва районунун аймагынан кармалган. Ал “адам өлтүрүү” беренеси боюнча айыпталып жаткан.

Айта кетсек, 27-ноябрь күнү таңкы саат 6:00 чамасында Сокулук РИИБинин убактылуу кармоочу жайында камакта отурган 4 киши качып кеткен. Алар “каракчылык” жана “киши өлтүрүү” беренелери менен кылмыш ишине шектелип камакта отурушкан. ИИМ жана Чүй ОИИББи тарабынан ыкчам изилдөө иштери күчөтүлгөн тартипте жүргүзүлүп, Бишкек ШИИББи тарабынан “Колго түшүрүү” операциясы жарыяланган болчу.

Качып кеткендердин экөө, Бакыт Дилдешов жана Рамиль Базаркулов 28-ноябрга караган түнү, үчүнчүсү Багтият Ачылдурдиев 28-ноябрда кармалган.