ЖЫЛНААМА, 22-ДЕКАБРЬ: Франциялык ырчы жана актриса Венесса Паради 45 жашка толду

Белгилүү америкалык актёр, кинорежиссёр Жонни Депптин мурунку сүйүктүүсү, франциялык ырчы, актриса жана модель Венесса Паради "Ак той" "Кафе де Флор" жана башка тасмалары аркылуу таанымал. Ал 1972-жылы 22-декабрда туулган. Бүгүн 45 жашка толду. Мындан улам ал тууралуу кызыктуу фактылар менен бөлүшүүнү туура көрдүк.

Атактуулук 14 жаштагы окуучу кезинде келген. Анда туугандарынын бири ыр жазып берип, ал ырды аткарган Венесса таанымал ырчыга айланган;
"Joe le taxi" чыгармасын аткарган соң миллиондогон күйөрмандарды топтогон. 15 жашында алгачкы альбомун чыгарып, ал тез арада сатылып кеткен;
Францияда атактуулуктун туу чокусуна чыгып, журналисттердин суроолоруна тайманбай жооп берген ырчы АКШга көчүп келгенде жашоосу түп-тамыры менен өзгөрөт. Англис тилин жакшы билбегендиктен көчөдөгү эл менен баарлашып жүрүп, жаргондор менен сүйлөөнү өздөштүрөт;
Ырчылыктан жетиштүү деңгээлдеги атак-даңк топтогон Паради өзүн актриса катары сынап көрүүнү чечкен;
17 жашында алгачкы жолу "Ак той" тасмасына тартылган. Бирок аткарган ролу үчүн бир канча сынга кабылган актриса, 5 жылга чейин киного тартылуудан баш тартып жүргөн;
Актёр Жонни Депп менен жарандык никеде жашап, 2 балалуу болушкан. Кийин эч кандай ызы-чуусу жок эле ажырашып, актёр балдарына Голливуддан үй алып берген.

22-декабрдын жылнаамасы.

Автор: Наргиза Талантбекова