Мушкер Акжол Сулайманбек уулу профессионалдык карьерасындагы кезектеги беттешин өткөрөт

Кыргыз мушкер Акжол Сулайманбек уулу

Кыргыз мушкери Акжол Сулайманбек уулу Орусиянын Екатеринбург шаарында өтө турган профессионалдык бокс боюнча мелдешке катышат. Бул тууралуу чет элдик басылмалар жазып чыгышты.

Маалыматка караганда, Кыргыз мушкери Акжол Сулайманбек уулу 13-февралда өтө турган "RCC Boxing Promotions" уюмунун мелдешине катышып, казакстандык Миржан Жаксылыков менен туш келет.

Казакстандык мушкер Миржан Жаксылыков

Айта кетсек, Акжол Сулайманбек уулу профессионалдык карьерасында 9 беттеш өткөрүп, бардыгында жеңишке жеткен. Анын ичинен 4 беттеште атаандашын нокаут менен жеңип алган. Ал эми казакстандык мушкер Миржан Жаксылыков 13 беттеш өткөрүп, анын ичинен 10 жолу жеңишке жетип, 3 жолу жеңилүү ызасын тарткан.

Азиянын бокс кеңешинин чемпиондук курун багындырган Акжол Сулайманбек уулу

Эске салсак, Акжол Сулайманбек уулу Азиянын бокс кеңешинин чемпиондук курунун ээси. Акжол 2-майда Орусияда өткөн "Extra Round 2" мелдеште орусиялык Денис Лашинге туш келип, 8 раунддук тирештин жыйынтыгында упай катыштыгында жеңүүчү аталган.

Автор: Нурсултан Нурболот уулу
Фото: Интернеттен алынган