ЖЫЛНААМА, 3-ЯНВАРЬ: Легендарлуу автожарышчы Михаэль Шумахер 49 жашка толду

"Формула-1" жарышы боюнча дүйнөнүн 7 жолку чемпиону, легендарлуу немис автожарышчысы Михаэль Шумахер Германиянын Хюрт-Хермюлхайм шаарында 1969-жылы 3-январында жарык дүйнөгө келген.

Атактуу спортчу "Формула-1" боюнча дүйнөнүн 7 жолку (1994, 1995, 2000, 2001, 2002, 2003, 2004-жылдар) чемпиону аталган. Ал рулга 3 жашында отуруп, 5 жашынан тарта карт жарыштарына катышып баштаган. Ал эми 14 жашында расмий түрдө жарышчы укугуна ээ болуп, өз өлкөсүнүн жана Европанын чемпиондуктарына катыша баштаган.

2013-жылы 29-декабрда Франциянын Мерибель курортунда Шумахер үй-бүлөсү менен эс алып жүргөн кезде лыжа менен тоодон түшүп келе жатып, жолдон чыгып кетип ташка чалынып, башы менен аскага урунган. Оор абалдагы спортчуну атайын тик учак менен Гренобль шаарындагы ооруканага жеткиришкен.

Учурда Михаэль Шумахер жасалма дем алдыруучу аппаратта жатат. Чет элдик маалымат каражаттары жазгандай, күйөрмандардын элесинде келишимдүү бойдон сакталуу Шумахердин салмагы учурда 45 гана килограмм.

4 жылдык реабилитациялоо аралыгында спортчуга 2 ирет нейрохирургиялык операция жасалган. Ал эми анын үй-бүлөсү ушул убакка чейин анын дарылануусуна болжол менен 16 миллион доллар сарптаганы маалым. Мындан тышкары Шумахердин үй-бүлөсү дары-дармекке каражат кылуу үчүн Норвегиядагы үйүн жана жеке учагын сатууга аргасыз болушкан.

Шумахер тууралуу кызыктуу фактылар:

Биринчи дүйнөлүк согуштагы эң мыкты учкуч Манфред фон Рихтгофенди "Кызыл барон" деп аташкан. Себеби анын аэропланынын өңү кызыл болгон. Шумахер ушул баронго окшоштугу жана "Ferrari" болиди, кийген спорттук кийими да кызыл болгондугу, өзүнүн жеңилбестиги үчүн "Кызыл барон" каймана атка конгон;
2006-жылдын 25-октябрында араб шейхи Мухаммед ибн Рашид аль-Мактум Михаэль Шумахерге жасалма "The world" архипелагынан баасы 7 миллион долларды чапчыган аралды белекке тартуулаган;
Анын бир тууган иниси Ральф Шумахер да атактуу автожарышчы;
Михаэль автожарыштан тышкары Швейцариянын 3-лигасында ойногон "Эхихенс" футбол клубунун оюнчусу болгон;
Шумахер “Остерикс жана Обеликс Олимпиада оюндарында” аттуу тасмага тартылып, кызыл кийимчен арабачынын ролун аткарган.

3-январдын жылнаамасы.

Автор: Айзада Тураркулова