Эске салсак, суроолор редакция тарабынан иргелет. Мааниси окшош, кайталанма суроолор эфирге чыгарылбайт.
15:00 Түз эфир башталды. Коноктор алып баруучунун ойготкуч суроолоруна жооп берүүдө.
15:08 Суроо: Жаңы жылда бири-бириңиздерге кандай белек кылдыңыздар?
"Мен жубайыма зер буюмун белек кылдым. Алгач 3 килограмм алтын белек кылайын дегем, бирок 300 грамм эле болуп калды", - деди Максат Надырбеков тамаша аралаш.
Нурзат Токтосунова: "А мен болсо Максатка кышында үшүбөсүн деп жылуу кийим белек кылдым".
15:11 Суроо: Нурзаттын жүрөгүн кантип багындырдыңыз, кандай курмандыктарга бардыңыз?
Жооп: "Нурзат экөөбүз эң башкысы бири-бирибизди түшүнүшүп, тил табышып кеттик. Нурзат сыртынан күчтүү көрүнгөнү менен ичинде назик, кичинекей кыздай. Курмандыкка бардым деп деле айтпайм", - дейт жолдошу.
15:15 Суроо: Нурзат эже, сиз тасмаларда мыкты ролдорду жаратасыз. Эмнеге актриса болгон эмессиз?
Нурзат Токтосунова: "Көптөр ошентип айтышат, өзүм деле актриса болууну кыялданчумун. Бирок азыр деле кеч эмес деп ойлойм".
Максат Надырбеков: "Нурзат төрөлгөндө эле актриса болуп төрөлсө керек дебейинби, тамаша. Тасмада мыкты роль жаратканы менен, үйдө кандай болсо ошондой жүрөт".
15:20 Суроо: Сүйүү 3 жылда эскирет деп коёт. Сиздердин баш кошконуңуздарга 3 жылдай болуп калды, сүйүүңүздөр эскирдиби?
Максат Надырбеков: "Сүйүүнү аздектеп, барктаса эч качан эскирбейт деп ойлойм. Түгөйлөр бири-бирине жаман сөз айтпашы керек, анткени ар бир жаман сөз жүрөктө сакталып калат".
Нурзат Токтосунова: "Максат менин үшүгөн жүрөгүмдү жылытып алды. Ал мени "эл эмне дейт" деген ойдон арылтты. Аябай терең ойлонуп, чечим чыгарат. Анын сабырдуулугу көптөгөн маселелерди жөнгө салууга жардам берет".
15:27 Суроо: Максат Нурзаттан кичүү болгону менен, экөө курдаштардай эле көрүнүшөт. Максат, атайын улуу көрүнүү үчүн толдуңбу?
Максат Надырбеков: "Жок, көп кыймылдабай, машыгуу залына барбай толуп кеттим. Жакында туура тамактанып арыктайын деп жатам".
15:31 Суроо: Үй-бүлөдө ким көп каражат табат?
Нурзат Токтосунова: "Ар кандай иш-чараларга чогуу барып, экөөбүз тең акча таап келебиз. Максаттын мындан сырткары өзүнүн бизнеси бар".
Максат Надырбеков: "Акчаны үйдө мен кармайм, канча киреше таба турганым сыр бойдон калсын".
15:34 Суроо: Нурзат, жолдошуң балалуу болгондон кийин "үйдө отур, иштебе" десе макул болот белеңиз?
Нурзат: "Ооба, албетте, отурам. Мисалы, кечээ Максат мени Вьетнамга жибербей койду. Менин оюм боюнча ар бир аял киши күйөөсүн сыйлап, айткан сөзүн угуш керек. Мындай учурда күйөөсү да жакшы мамиле кылып, үй-бүлө бактылуу болот."
15:36 Эфирде кызыктуу оюн орун алды.
15:40 Суроо: Максат, жубайыңдын колун эфир башталгандан бери кармап отурасың. Кичине таарыныша кеттиңер беле?
Максат Надырбеков: "Ар бир мырза аялын элдин көзүнчө эркелетип, жакшы мамиле жасоодон тартынбашы керек деп ойлойм. Анткени аялзаты жакшы мамилеге татыктуу".
15:46 Суроо: Нурзат, жолдошуңузду жаш кыздардан кызганасызбы?
Нурзат Токтосунова: "Жолдошумду такыр кызганбайм. Себеби өзүмө да, Максатка да ишенем. Экөөбүз сүйлөшүп алганбыз, Максат бир жакка кетсе тынчын алып телефон чала бербейм".
15:50 Суроо: Бири-бириңердин өзгөртө албаган кандай сапаттарыңар бар?
Максат Надырбеков: "Нурзаттын өжөрлүгү менен таарынчаактыгын жоюуга мүмкүн эмес".
Нурзат Токтосунова: "Мен алдыга койгон максатыма дайыма жетем. Ошол сапатымдын айынан көп нерсеге жетиштим. Максат бир көңүлү калган киши менен кайра такыр сүйлөшпөйт. А мен болсо кечиримдүүмүн".
15:55 Суроо: Биргеликте кандайдыр бир долбоорду ишке ашырайын деген оюңар барбы?
Нурзат Токтосунова: "Бизде идея көп, бирок эң биринчи максатым - балалуу болуу".
15:57 Суроо: "Сиздер кайсы бир компанияны аябай мактап жарнамаладыңыздар эле. Мен ал компанияга 20 миң сом салып, киреше таппай эле кайра чыгым болдум. Кайсы бир нерсени жарнамалоонун алдында жоопкерчилик тууралуу ойлоносуздарбы?"
Максат Надырбеков, Нурзат Токтосунова: "Бир компанияга ишенип алып, 4 миң долларга алданып калдык. Биз жарнама кылып, өзүбүз да акча салганбыз. Бирок эч кимди акча сал деп мажбурлаган эмеспиз".
16:05 Түгөйлөр окурмандын суранычы боюнча "Энекем" чыгармасын аткарышууда.
16:11 Түз эфир аягына чыкты.
