Кочкор-Атада мушташтан алган жаракатынан улам каза болгон жарандын өлүмүнө шектелип 45 жаштагы тургун кармалды

Жалал-Абад облусунун Кочкор-Ата шаарында мушташтан алган жаракатынан улам каза болгон жарандын өлүмүнө шектелип 45 жаштагы тургун кармалды. Бул тууралуу ИИМдин маалымат кызматынан кабарлашты.

Маалым болгондой, жергиликтүү тургундар 8-январь күнү Кочкор-Ата шаарынын көчөлөрүнүн биринде эс-учун жоготуп жерде жаткан жаранды ооруканага жеткиришип, бирок эсине келбей каза болгондугу тууралуу Ноокен РИИБинин нөөмөт бөлүмүнө кабар беришкен.

Бул окуя боюнча милиция кызматкерлери ооруканага барып каза болгон жарандын аты-жөнүн аныктоо максатында маркумга соттук-медициналык экспертиза дайындашкан. Жыйынтыгында, жарандын эриндеринде жана башынын артында көгөргөн тактар бар экендиги аныкталган. Ошондой эле каза болгон жаран Кочкор-Ата шаарынын 43 жаштагы К.А. аттуу тургуну болуп чыккан. Бул факты боюнча милиция кызматкерлери ыкчам иликтөө иштерин жүргүзүшүп, натыйжада Кочкор-Ата шаарынын 45 жаштагы тургуну кылмышка шектүү катары кармалып көрсөтмө берген.

Шектүү берген көрсөтмөсүндө 8-январь күнү Кочкор-Ата шаарында жайгашкан кафелердин биринде каза болгон К.А аттуу жаран менен спирт ичимдигин ичип отурушуп, өз ара чырдашып кетишкенин жана аны жыгылта чаап андан ары басып кеткендигин билдирген.

Бул факты боюнча Кыргыз Республикасынын Кылмыш-жаза кодексинин 104-беренесинин 4-пункту менен кылмыш иши козголуп, шектүү Ноокен РИИБинин убактылуу кармоочу жайына киргизилди. Учурда териштирүү жана тергөө амалдары жүрүүдө.

Автор: Жамалидин Парманкулов