Мушкер Хабиб Нурмагомедов: "Кыргыз эли менен Дагестан элинин окшоштугу - бул мырзаларынын балбандыгында"

Хабиб Нурмагомедов атасы Абдулманап Нурмагомедов менен

Бүгүн, 24-январда белгилүү орусиялык мушкер Хабиб Нурмагомедов Кыргыз жериндеги күйөрмандары менен жолугушту. Жолугушуу Бишкектеги соода борборлорунун биринде өтүп ага миңден ашуун адам келген. Суук аба ырайына карабай мушкер менен жолугушууга келген күйөрмандар имаратка батпай калышты.

Иш-чарага кыргыз спортунун өкүлдөрү, Кыргыз Олимпиадалык комитетинин төрагасы келди.

Мушкер атасы менен келген. Атасы да айтылуу спортчу, Хабиб Нурмагомедовдун машыктыруучусу.

"Биздин машыктыруу клубубуз Кыргыз мушкерлерин машыктырууга даяр", - деди ал жолугушуунун алгачкы мүнөттөрүндө эле.

Журналисттердин суроосуна жооп берип жатып Нурмагомедов Кыргыз мушкерлери күчтүү экенин белгилеп, аларда UFC чемпиондору болуу мүмкүнчүлүгү жогору экенин айтып өттү.

"Биринчи жолу келип эле ушундай сандагы күйөрмандарды көргөнүмө кубанычтамын, ар бир күйөрманым үчүн жоопкерчиликти сезем. Ошондой эле ар биринин үмүтүн актаганга аракет кылам. 2013-жылдан бери 5 оор операцияны башымдан өткөрдүм, 2,5 жыл беттештерге чыккан жокмун. Ийгиликке жетүү үчүн көптөгөн кыйынчылыктарды басып өттүм. Кыргыз эли менен Дагестан элинин окшоштугу - бул мырзаларынын балбандыгында", - деди ал.

Жеңилүү ызасын тартпаган адам эч кандай ийгиликке жетишпей тургандыгын айтты мушкер.

"Америкага барганымда Хабиб деген атым татаал болгондуктан атам "Бүркүт" деген каймана ат коюп берген. Анткени бүркүт Дагестан элинде күчтүүлүктүн символу", - деди ал.