Дүйнөдөгү эң келишимдүү кылмышкер Жереми Микс менен орусиялык ырчы Ольга Бузова сүйүшкөндөр күнүн чогуу өткөрүшөт

Дүйнөдөгү эң келишимдүү кылмышкер Жереми Микс менен орусиялык ырчы Ольга Бузова сүйүшкөндөр күнүн чогуу өткөрүшөт. Бул тууралуу Жереми Микс орус журналисттеринин суроолоруна жооп берип жатканда билдирген.

Маалым болгондой, ал кечээ, 31-январда ырчы Ольга Бузованын "WI-FI" аталышындагы ырынын клибине тартылуу үчүн Орусияга учуп келген. Бузова ошол күнү болгон катаал аба ырайына жана жол тыгындарына карабастан, клибинин каарманын аэропорттон өз убагында тосуп алганга жетишкен. Андан соң экөө журналисттер менен жолугушуу өткөрүшүп, бир катар суроолорго жооп беришкен. Анда, Жереми Микс Орусияга болгон саякаты 2 жумага созула турганын айтып, 14-февраль - Сүйүшкөндөр күнүн Бузова менен чогуу өткөрө турганын билдирген.

"Мен Орусия өлкөсү менен кенен таанышкым келет. Алгач эле аталган мамлекеттин борборунда жайгашкан "Кызыл аянтты" көрдүм. Дагы саякаттай турган жерлер көп. Жалпысынан 2 жумадай бул жакта болом. Ал эми сүйүшкөндөр күнүн Ольга Бузова менен чогуу өткөрөм", - деген ал.

Айта кетсек, 2014-жылы Жереми Микс түрмөдө отурган кезинде түшкөн сүрөтү аркылуу интернеттеги эң популярдуу адамга айланган. Ал курал-жаракты мыйзамсыз сактоо беренеси боюнча кармалып, эркинен ажыратылган. Калифорниялык полиция Жереминин сүрөтүн интернетке жүктөөр замат колдонуучулар аны эң келишимдүү кылмышкер деп табышкан. Абактан чыккан соң Жереми популярдуу жана кымбат моделге айланган. Буга чейин Микстин миллиардер айым менен болгон сүйүү мамилеси коомчулукта чоң талкуу жараткан.

Автор: Айзада Тураркулова