Евгений Тимофеев Кышкы Олимпиада оюндарында өлкө тарыхындагы эң мыкты көрсөткүчтөрдүн бирине ээ болду

Евгений Тимофеев бүгүнкү лыжанын слалом жарышында Кышкы Олимпиада оюндарынын алкагында өлкө тарыхындагы эң мыкты көрсөткүчтөрдүн бирине ээ болду.

Тактап айтканда, өлкө эгемендүүлүктү алгандан бери Кышкы Олимпиада оюндарына 7 ирет катышкан: 1994, 1998, 2006 жана 2014-жылдары бирден спортчулар барса, 2002, 2010 жана 2018-жылдары экиден спортчу барды. Тарыхтагы эң мыкты көрсөткүч катары 1998-жылы Япониянын Нагано шаарында өткөн Олимпиадада биатлончу Александр Тропников ээлеген 36-орун. Экинчиде 2002-жылы АКШнын Солт-Лейк-Сити шаарында орун алган Олимпиадада трамплинден секирүү боюнча Дмитрий Чвыков багынткан 39-орун. Ал эми Евгений Тимофеев көп убакыттан бери үчүнчү орунду тоо лыжачы Иван Борисов менен бөлүшүп келген. Борисов 2006-жылы италиянын Турин шаарында өткөн Олимпиадада ээлеген 41-оруну, Тимофеев болсо 2014-жылы Сочи шаарында өткөн Олимпиададагы 41-оруну менен келе жаткан болчу. Эми Тимофеев Пйоңчаңда өтүп жаткан Олимпиада оюндарында ээлеген 40-оруну менен өлкөдөгү спортчулардын ичинен 3-сапка жайгашты.

Белгилей кетсек, Евгений Тимофеев 1994-жылы 16-октябрда борбор калаада жарык дүйнөгө келген.

Автор: Бактыяр Кыдыралиев