ОИИБ: "Баткенде соодагерлерди алдап жүргөн деп шектелип үч бир тууган аял кармалды"

Баткенде алдамчылыкка шектелип үч аял кармалды. Бул тууралуу SUPER.KG'ге 2-мартта Баткен ОИИБинин маалымат катчысы Дамира Юсупова кабарлады.

Маалым болгондой, Кадамжай районундагы "Баяман Баатыр" базарында 3 аял февраль айында соодагерлердин ишеничине кирүү менен товарларын алып, акчаларын кайтарбай жүрүшкөндүгү тууралуу милицияга арыздар келип түшкөн. Арыздын негизинде Кадамжай РИИБи тарабынан кылмыш иши козголуп, издөө иштеринин жүрүшүндө ал аялдардын бири Ош шаарынан кармалган.

"Анын жоопторунун негизинде дагы эки аял шектүү катары кармалды. Алар 48 жаштагы Б.Р., 40 жаштагы Б.Н. жана 36 жаштагы Б.Г. аттуу бир туугандар болуп чыгышты. Кара-Суу районунун тургундары болгон бул бир тууган аялдар өз аттарын жашырып, башка ат менен сатуучуларды алдап, товарларын алып, изин жашырып жүрүшкөндүктөрү тергөөнүн жүрүшүндө аныкталды. Алардын бири Б.Н. 2017-жылдан бери Жалал-Абад облусунда да алдамчылык фактысынын негизинде издөөдө жүргөн. Учурда факты боюнча териштирүү иштери жүрүп жатат", - деди Юсупова.

Автор: Жамалидин Парманкулов