Ошто өткөн футбол боюнча эл аралык мелдеште өзбекстандык "Истиклол" командасы жеңишке жетти

Ош шаарында өткөн футбол боюнча Сулайман-Тоо кубогу аталышындагы эл аралык мелдеште өзбекстандык "Истиклол" командасы жеңип алды. Бул тууралуу SUPER.KG порталына Кыргыз Республикасынын футбол федерациясынан билдирди.

Ош шаарында жайгашкан Асылбек Момунов атындагы футболдук академиянын талаасында орун алган мелдеште 8 команда катышты. Анда Кыргыз өлкөсүнөн 7 команда жана Өзбекстандан 1 команда күч сынашты.

Мелдештин жыйынтыгында финалдык беттеште өзбекстандык "Истиклол" менен Футболдук академиянын футболчулары кез келди. Анда өзбекстандык футболчулар талаа ээлерине мүмкүнчүлүк бербей 5:0 эсеби менен жеңишке жетти.

3-орунду Кочкор-Ата шаарынын "Нефтчи" командасы ээледи. Алар коло медаль үчүн беттеште "Li-Ning" командасына туш келип, 3:0 эсебинде жеңишке жетти.

Мелдешке катышкан командалар: "Истиклол” (Фергана, Өзбекстан), “Ош”, “Li-Ning”, “Футбол академиясы” (Ош), “Кызыл Мехнат”, “Жалал-Абад”, “Нефтчи” (Кочкор-Ата) жана "Шахтёр” (Кызыл-Кыя).

Ошондой эле мелдештин жыйынтыгында мыкты футболчулар жеке белектер менен сыйланды:

Мыкты дарбазачы - Роман Мирзакандов (“Футбол академиясы”);

Мыкты коргоочу - Алмазбек Маликов ("Нефтчи");

Мыкты жарым-коргоочу: Келечек Касымов ("Li-Ning");

Бомбардир - Эльёр Акбаров ("Истиклол");

Мыкты оюнчу - Риза Айвазов ("Истиклол");

Мыкты машыктыруучу - Хуршит Лутфуллаев (“Футбол академиясы”).

Автор: Нурсултан Нурболот уулу
Фото: Футбол федерациясы